Roh kong mêi têa lân lu sap nah tá chói ai mơ’nui hơnăm kố nah hiăng pro tro lup râ ó ăm hên kong pơlê, pơlê kong kơdrâm kơpong peăng Tơdế Tơnêi têa – Tây Nguyên. Klêi kong prâi pro ôh tá tơniăn, kuăn pơlê kơpong têa kân lu dế chôa ‘lâng xông tơtêk, rĕng tơniăn tơdroăng rêh ối.

Ôh tá xê to gum kuăn pơlê drêng têa kân lân lu, klêi kơ’nâi kong prâi pro ôh tá tơniăn, mô đô̆i pơtối ai mâ a hên kong pơlê vâ rơnêu kế tơmeăm khoăng. Mâu ngoh tŏng gum tŏng têa ki lân lu, tah trâp a hngêi pơkeăng, tíu xiâm khăm pơlât, xing xoăng tơmeăm kâ ăm kuăn pơlê ƀă rak ngăn ăm mâu ngế tamo châi thế pơlât ton hâi xua têa kân lân lu. Ƀok thái pơkeăng Võ Thôi, Phŏ Kăn pơkuâ Hngêi pơkeăng kân Đa Khoa kơpong Quảng Nam, tối ăm ‘nâi:

‘’Drêng ai têa lân lu mê Khu xiâm pơkuâ lêng pơlê kong kân Đà Nẵng klêi mê Tíu xiâm hbrâ mơdât pơreăng kơpong 5 hiăng pơtroh mơngế ƀă đi đo cho vâ tơdjêp vâ ‘nâi tơdroăng kal. Drêng têa lân lu a hngêi pơkeăng ối dâng 6 tâk mê Khu xiâm pơkuâ mô đô̆i dêi pơlê kong kân Đà Nẵng xuân môi tiah Tíu xiâm hbrâ mơdât kơpong 5 tŏng gum ăm hngêi pơkeăng vâ mơgrúa tơmeăm khoăng xua têa lân lu. Cho mơnê mâu đông lêng hiăng tŏng gum’’.

Rơpâu ngế kuăn pơlê hiăng châ mô đô̆i teăm tơdrêng tŏng gum hlŭn ing têa kân lân lu ó. Drêng mâu roh mơhot têa lân lu pơtối rĕng nếo prôk tơkâ hluâ, tá hâi teăm pơtê, kăn ƀô̆, mâu mô đô̆i pơtối lăm tŏng gum kuăn pơlê. Pêi pro Tơdroăng pêi cheăng ‘’Quảng Trung’’ xua Ngế pro xiâm hnê ngăn Chin phuh mơhnhôk djâ, mô đô̆i Quân khu 5 pơtối ai mâ a mâu kơpong ki tro lup râ ó vâ gum kuăn pơlê mơdâng hngêi trăng. Mâu hâi kố, rơpâu kăn ƀô̆, mô đô̆i pôu a châ hnoăng nếo – pro ngế ki meăn pro hngêi, tâi hiêm mơno vêh mơjiâng chôa ‘mơnât, toăng hngêi ăm kuăn pơlê kơpong kong prâi pro ôh tá tơniăn. Pêi cheăng hiêt kâ hmê, koi iâ chô, mâu ngoh hbrâ rêm hâi kong tô ki iâ ƀă pói vâ gum kuăn pơlê rĕng ai toăng hngêi krá kâk, tơniăn tơdroăng rêh ối hdrối Têt lo hơnăm nếo.

Trung ŭy Phạm Ngọc Dân, Tiêu đoân 303, Trung đoân 584, Khu xiâm pơkuâ Mô đô̆i kong pơlê Dak Lak, dế rơtế mô đô̆i vêh mơjiâng pro hngêi ăm kuăn pơlê, tối:

‘’Pêi pro tơdroăng Ngế pro xiâm hnê ngăn Chin phuh mơhnhôk djâ, khu mô đô̆i Quân khu ƀă mâu tíu pêi cheăng dêi Khu xiâm pơkuâ lêng hiăng lo lăm pêi kơtăng, pêi kơhâi, pêi kơmăng, tá kong mêi, kong tô. Nhŏng o tah lôi tơdroăng pá ‘na kế tơmeăm khoăng, prếi găch, mơ-eăm troh hâi lơ 15/1/2026 kô kêi đeăng ki vâ iâ 50% kơxô̆ toăng hngêi khu râ kăn pơkuâ hiăng pơcháu ăm khu mô đô̆i Quân khu 5 ƀă mâu tíu pêi cheăng dêi Khu xiâm pơkuâ lêng tung pơlê pơla’’.

Rơpâu kăn ƀô̆, mô đô̆i Quân khu 5 hiăng ƀă dế ai mâ a lâp mâu thôn, kơtâu ki tro tơdjâk kong prâi pro, tơdrêng tŏng gum mơjiâng pro hngêi nếo, rơnêu hngêi trăng ăm kuăn pơlê tro tơ’nhê. Hiêm mơno pôu râng hnoăng cheăng, tơdroăng ki mơ-eăm tâi hiêm dêi mâu ngế lêng Mô đô̆i Pôa Hồ hiăng păng ‘nâng troh lâp lu, pro trâu hơhngế tuăn pâ dêi kuăn pơlê peăng Tơdế tơnêi têa – Tây Nguyên.

Hlo mô đô̆i tơƀrêi tơbrêh, kuăn pơlê tung thôn, kơtâu xuân tơdjuôm ivá. Ngế pế hmê, ngế pế têa, ngế gum tơdroăng cheăng, rơtế dêi pó gum tơdroăng pá puât. Tung dế kơpong tơnêi nah troh tơ’nhê klêi kơ’nâi mơhot têa kân lu, tuăn pâ khu mô đô̆i – kuăn pơlê thăm tơrŭm, hơtô tuăn pâ. Jâ Nguyễn Thị Mận, ối a cheăm Hòa Thịnh, kong pơlê Dak Lak, rơrêk tung hiêm mơno tối:

‘’Hlo mâu tăm mô đô̆i pêi pá puât ‘nâng xua mê nâ o xuân troh veăng gum tơdroăng ki klâi mê gum. Ngin gum mô đô̆i, pế ăm mô đô̆i kâ roh kâ hmê kơhiêm vâ ai ivá mơjiâng pro hngêi ăm kuăn pơlê’’.

Rơtế kâ, rơtế ối, rơtế pêi, rơtế tơpui nâl dêi kuăn pơlê mâu hdroâng kuăn ngo. Tuăn pâ khu mô đô̆i – kuăn pơlê rế thăm krá tơniăn, mơjiâng chiâng ‘’hiêm mơno kuăn pơlê’’ krá tơniăn, tơ’nôm ivá ó rơdêi vâ khu mô đô̆i Quân khu 5 krá kơteăng a rêm troăng prôk mơjiâng ƀă gâk kỉng Tơnêi têa. Thiê̆u tươ̆ng Lương Đình Chung, Chính ŭy Quân khu 5 mơnhên, tung plâ 81 hơnăm mơjiâng, tơplâ ƀă xông kân, Khu mô đô̆i Kuăn pơlê Việt Nam đi đo mơhno nhên hnoăng djâ troăng ahdrối, prôk hdrối, xua kuăn pơlê mê pêi:

‘’Mô đô̆i pin ing Kuăn pơlê mê chiâng, xua kuăn pơlê mê tơplâ’’. Pro đông tung kơpong peăng tơdế Tây Nguyên, tơnêi trâm hên kong prâi pro ôh tá tơniăn, kăn ƀô̆, mô đô̆i khu lêng Quân khu 5 hlê plĕng trâu hơhngế tiah kố, gum kuăn pơlê cho pơkâ ing plâi nuih, troh ƀă kuăn pơlê rĕng má môi, kô pêi rĕng má môi. Ngin xuân hiăng veăng rơtế khu cheăng kal ƀă tâi tâng kuăn pơlê tung quân khu hiăng tơkâ hlyâ mâu tơdroăng pá puât, tơbrêi tơbrêh drêng kong prâi pro mơhot têa kân lu. Drêng kuăn pơlê ƀă mâu kong pơlê hiăng tơkâ hluâ kong prâi pro mơhot têa kân lân lu mê kăn ƀô̆ mâu lêng Khu lêng kuăn pơlê tâ hơniêp lĕm ƀă hơtô hiêm mơno’’.

Drêng kong mêi têa lân lu ó ƀă mâu tơdroăng pá puât ai hên, um méa ngế lêng Quân khu 5 chôa ‘lâng xua kuăn pơlê, rơtế kuăn pơlê hiăng chiâng tíu hgiên krá ăm kuăn pơlê kơpong peăng tơdế Tơnêi têa – Tây Nguyên. Tung pơla kô chiâng vâ prôk lăm, mâu tơdroăng tuăn pâ khu mô đô̆i – kuăn pơlê ối troh tá ah. ‘’Mô đô̆i Pôa Hồ - Mô đô̆i dêi kuăn pơlê’’, - um méa mê đi đo ối tung tuăn ngoâ kuăn pơlê peăng tơdế Tơnêi têa, Tây Nguyên./.