Tung mâu hâi hdrối, kong mêi kân ton hâi pro hên mâu cheăng kơpong peăng mâ hâi Lo (dêi kong pơlê Phú Yên ton nah) tro têa lân lu pro klâ krê, hên rơpŏng kuăn pơlê ôh tá ai kế kâ, tung pơla mê tơdroăng tŏng gum trâm hên xơpá xua têa kân tâk đik rĕng.

Hvái ngăn kơpong têa lu, hên khu grup, khu lăm pleăng hnoăng tơná, dế thâ tơmâng xo, klâ túa, kơxu tơmeăm pơtroh ăm mâu kơpong tro klâ krê. Vi ƀan Măt trâ̆n Tơnêi têa Việt Nam kong pơlê Dak Lak hiăng pơtroh kơthô krếo veăng kum kuăn pơlê tơkâ luâ xơpá xua kong prâi, tối nhên rêm rơpŏng veăng tơlo mơhé iâ xuân ai pơxúa kân tung tơdroăng veăng kum kuăn pơlê tơkâ luâ pá puât, rĕng tơniăn tung rêh ối.

-Vâ tơniăn ôh tá ai kơbố tro kơklêa lơ trâm rơ-iô, khu râ kăn pơkuâ kong pơlê Gia Lai hiăng thế tâi tâng khu mơngế lăm tŏng gum. Pôa Nguyễn Tuấn Thanh, Phŏ Kăn hnê ngăn hnê mơhno má môi Viƀan kong pơlê Gia Lai, tối ăm ‘nâi kong pơlê dế tơkŭm hên tung tơdroăng tŏng ƀă tơniăn tâi tâng kuăn pơlê.

A Tíu troh xĕn ối, khu cheăng kong pơlê Gia Lai xuân rak tơdroăng ki gâk plâ hâi plâ măng, tơniăn gâk kring, khăm pơlât, tŏng gum hiêm mơno ƀă ki rơhêng vâ tối tơdroăng ô kâ ăm hrĭng ngế kuăn pơlê dế thế xĕn hngêi ối. Mâu kơxuô xup kơxŏng khăng, kơthung têa mám, pơkhom, on tiê...Châ pơtroh rêm kơpong môi. Ôh tá xê to kuăn pơlê tung kong pơlê, hên khu ngế tŏng gum mơngế hliăng tiâ pá puât ing mâu kong pơlê ki achê hiăng troh Gia Lai, djâ pơkeăng, ếo mêi, kế kâ ki rĕng vâ tŏng gum kuăn pơlê.