Tung toăng hngêi nếo kân rơdâ, pôa Kră Jăn Ha Nhang, krâ pơlê thôn Đam Pao, cheăm Phú Sơn Lâm Hà, kong pơlê Lâm Đồng, xuân mơdoh hên chô ăm tơdroăng cheăng ki pôa ngăn cho hnoăng cheăng dêi tơná: mơhnhôk kuăn pơlê rak tơdroăng cheăng tiô khôi vâi krâ nah.  Rơpŏng pôa ai vâ chê 5ha kơphế, dâng 100 loăng plâi sầu riêng ƀă tơdroăng teăn ếo pơtâk tiô khôi vâi krâ nah gum tơdroăng rêh ối tơniăn. Laga tơdroăng ki pôa hâk má môi cho tung kơdrum hngêi dêi tơná, pôa hiăng mơdâng môi toăng hngêi tiô khôi vâi krâ nah, mơđah tơbleăng chêng koăng, tơmeăm ki pro ƀă kŏng ƀă mâu tơmeăm xúa ƀă tơdroăng rêh ối dêi mơngế K’Ho kơjôi Cil.

Ing tơdroăng pêi pro dêi tơná, krâ pơlê Kră Jăn Ha Nhang mơhnhôk vâi krâ nhŏng o rơtế rak cheăng tĕn hmôu jiâ. Ƀă ki rơhêng vâ tối a thôn Dam Pao, cheăng tĕn hmôu jiâ xuân ối châ hên rơpŏng pơtối rak vế.

‘’Akố cho vâ chê 300 rơpŏng hdroâng kuăn ngo, pêi cheăng tĕn hmôu jiâ lối 225 rơpŏng. Mâu vâi muăn sap ing 15 hơnăm troh mâu vâi jâ 70, 80 hơnăm xuân tĕn tâi. Mâu vâi jâ xuân kơnôm ing chôu phut ki pơtê pêi cheăng a hngêi tĕn, tĕn mê xuân châ tê cho tê 300, 400 rơpâu ngăn tiô kơ túa xuân ai liăn tơniăn há’’.

Tơdroăng a Dam Pao ăm hlo, rak cheăng tiô khôi vâi krâ nah xuân cho rak môi iâ khôi túa lĕm tung tơdroăng rêh ối hâi kố, malối cho drêng cheăng tĕn kum kuăn pơlê ai tơ'nôm kơxô̆ liăn pêi lo ƀă hnê cheăng ăm rơxông nếo.

Ƀă mơngế ki kuăn pơlê loi tơngah, ki rơhêng vâ tối cho ing tơdroăng ki djâ troăng ahdrối. Drêng krâ pơlê pêi ahdrối, tơpui ƀă mâu tơdroăng ki achê ƀă tơdroăng rêh ối ƀă rơtế vâi krâ nhŏng o tơkâ luâ mâu tơdroăng ki nhên, rơkong tơpui mê tơ'lêi mot tung pơlê pơla tâ. Kố xuân cho tơdroăng ki khu kăn pơkuâ cheăm a Phú Sơn Lâm Hà hlo nhên tung pơla xing xoăng pro rế lĕm tíu kuăn pơlê rêh ối, tơkŭm mâu kăn ƀă mâu thôn.

Ngoh Ha Mi, chuyên viên Ƀơrô Mơhno túa lĕm tro - Pơlê pơla cheăm Phú Sơn Lâm Hà, ăm 'nâi: a 4 to thôn ki ai hên kuăn pơlê hdroâng kuăn ngo, rơkong tơpui dêi krâ pơlê ai tơdjâk kân tung hnê tối, mơhnhôk kuăn pơlê.

‘’ Tung hneăng hôp vâi krâ pơlê tơpui tối mê kuăn pơlê loi khât ƀă túa hnê mơhno, túa mơhnhôk, hnê tối dêi vâi krâ pơlê, pơtâng tối mâu túa pêi cheăng kâ rơkê, rak vế khôi túa lĕm tro ƀă tá 'na cheăng kal kí, gâk kring pơlê pơla. Vâi krâ pơlê xuân kơhnâ khât tối tơbleăng hiâm mơno dêi pơlê pơla.‘’

Mơnhên ngế ki châ kuăn pơlê loi tơngah cho kông tơdjêp pơla khu râ kăn pơkuâ ƀă kuăn pơlê, mâu hơnăm hiăng hluâ, mâu khu râ kăn pơkuâ ƀă khu tơrŭm cheăng kong pơlê Lâm Đồng hiăng tơmâng pêi pro tŭm mâu troăng hơlâ tiô pơkâ; tung mê ai tối tơbleăng tơdroăng, hnê hriâm tơdroăng ki rơkê plĕng, rak ngăn tơdroăng rêh ối kế tơmeăm khoăng ƀă hiâm mơno. Ƀă ki kal tâ cho pro tơ'lêi hlâu vâ khu kố mơnhông hnoăng cheăng tơdrêng a pơlê pơla.

A cheăm kơtiê xahpá Sơn Điền, pôa Trịnh Văn Dũng, Kăn pơkuâ Ƀơrô Mơhno túa lĕm tro - Pơlê pơla cheăm, ăm 'nâi, tơdroăng tơrŭm ƀă mâu krâ pơlê, ngế ki kuăn pơlê loi tơngah châ rak vế đi đo. Khu kăn pơkuâ krếo thế ngế ki kuăn pơlê loi tơngah veăng mâu rôh hôp, tối tơbleăng 'na troăng hơlâ dêi Đảng, troăng hơlâ, luât dêi Tơnêi têa vâ mâu tơdroăng kố châ pơtroh troh kuăn pơlê ƀă tơdroăng ki tơpui achê, tơ'lêi hlê.

‘’ Sap ing apoăng hơnăm cheăm hiăng mơjiâng pơkâ rak ngăn mơngế ki kuăn pơlê pâ nhoăm tung cheăm xuân môi tiah tơdroăng tơrŭm cheăng. Tung mâu rôh hôp dêi Đảng uỷ, Vi ƀan cheăm xuân krếo mơngế ki kuăn pơlê pâ nhoăm tung cheăm veăng hôp vâ ai tơdroăng tơpui tơno, tơmâng xuân môi tiah 'nâi 'na troăng hơlâ, luât dêi Đảng, luât dêi Tơnêi têa vâ hnê tối ăm kuăn pơlê tung cheăm Sơn Điền.‘’

Ing mơhnhôk mơnhông pêi cheăng kâ, rak vế khôi túa lĕm tro troh tơleăng tơxup tơbriât, hnê tối 'na luât, hbrâ mơdât mâu tơdroăng ki ôh tá tơniăn ƀă veăng pêi mâu tơdroăng pơkuâ xêh 'na gâk kring, tơniăn, hnoăng cheăng dêi ngế ki kuăn pơlê loi tơngah dế hlo ai a hên tơdroăng tung rêh ối pơlê pơla a mâu pơlê cheăm dêi kong pơlê Lâm Đồng.

Klêi kơ'nâi rah xo bro lế lĕm tro tíu pêi cheăng, Lâm Đồng ai tơnêi tíu kân rơdâ, pơlê pơla kuăn pơlê hên túa, ƀă hên kơpong hdroâng kuăn ngo rêh ối. Pôa Bùi Ngọc Sơn, Kăn phŏ pơkuâ Khu ngăn hdroâng kuăn ngo ƀă tơdroăng loi tĭng tiô khôp kong pơlê Lâm Đồng, ăm 'nâi, tơdroăng mơnhông hnoăng dêi mâu ngế ki châ kuăn pơlê loi tơngah rế ai pơxúa tung tơdroăng djâ troăng hơlâ, troăng pơkâ troh achê kuăn pơlê ƀă tối tơbleăng hiâm mơno, tơdroăng púi vâ ing pơlê pơla.

‘’Klêi kơ'nâi pêi pro tơ'mot kong pơlê khu lêng kuăn pơlê tung kong pơlê cho ai 883 ngế. Ngế ki châ kuăn pơlê loi nhuô̆m mơhno hnoăng cheăng tung tơdroăng veăng kum mơjiâng, hnê mơhno, hnê tối mơhnhôk vâi krâ nhŏng o veăng mâu troăng hơlâ pơkâ dêi Đảng xuân môi tiah luât pơkâ dêi Tơnêi têa. Ngế ki châ kuăn pơlê loi nhuô̆m hnê tối mâu tơdroăng ki rơkê plĕng klêi mê ngế ki lĕm tơdroăng ki lĕm, hnê mơhno tung tơdroăng pêi cheăng kâ, rêh ối ăm vâi krâ nhŏng o ƀă veăng rak vế tơniăn gâk kring tung pơlê pơla.’’

Pơtối tơdroăng tơmâng ngăn dêi Đảng, Tơnêi têa ƀă hnoăng cheăng dêi mơngế ki kuăn pơlê loi tơngah tung pơlê pơla, hâi lơ 20/9/2026, Pơkâ kơxô̆ 307 dêi Chin phuh pơxiâm ai xêt khât pơkâ nhên troăng hơlâ tŏng kum ƀă mơngế ki kuăn pơlê loi tơngah tung kơpong hdroâng kuăn ngo. Ƀă kơlo tŏng kum 'na tơdroăng kal, tŏng kum tơmeăm khoăng, mơhnhôk hiâm mơno châ mơdêk tâ. Kố cho xiâm kối vâ kong pơlê Lâm Đồng pơtối pêi pro tro troăng hơlâ ƀă mơngế ki kuăn pơlê loi tơngah, tơdrêng amê xuân cho ivá vâ mơngế ki kuăn pơlê loi tơngah a pơlê cheăm mơnhông tâ nếo hnoăng cheăng ki phá tơ-ê a pơlê pơla./.