A rôh trâm mâ kuăn pơlê bêng 4, pơlê kong kơdrâm Đà Lạt, Khu kăn Kuô̆k hô̆i kong pơlê Lâm Đồng hiăng tơmâng kuăn pơlê tối hên tơdroăng ki kal, malối cho mâu tơdroăng ki xơpá ‘na tơdroăng rêh ối, tíu ối, rơxế to prôk lăm dêi kăn ƀô̆, kong chưk klêi kơ’nâi ‘mot tơkŭm pái to kong pơlê Lâm Đồng, Dak Nông, Bình Thuận. Pakĭng mâu tơdroăng xơpá tung tơdroăng ki prôk lăm, tơdroăng tŏng gum ‘na tíu kâ, tíu ối cho môi tơdroăng ki xơpá, pâ thế kong pơlê Lâm Đồng kal rĕng ai túa pơkâ tơleăng.  Kuăn pơlê Hồ Trung Hiếu tối dêi tơdroăng tơmiât tơná:

“Á tôu tuăn drêng vâ chê 2 rơpâu ngế nhŏng o kăn ƀô̆ kong chưk dêi péa to kong pơlê Dak Nông ƀă Bình Thuận vâi vêh akố, tiah mê tơdroăng ki xoăng, tơdroăng tŏng gum ăm mâu nhŏng o kố gá môi tiah lâi. Xua drêng nhŏng vêh troh akố, tơdroăng prôk lăm kô xơpá, tơdroăng puí vâ ‘na tíu ối a Đà Lạt, tâng ton xŏn mê kô tâk hên ‘na tíu ối. Á rơhêng vâ kong pơlê Lâm Đồng kal ai troăng pơkâ ƀă troăng pêi pro tơdrêng vâ tŏng gum. Nôkố, tiô á ‘nâi Lâm Đồng – Đà Lạt mê tơdroăng ki tŏng gum, mơjiâng pro hngêi ối gá hrá tung pơla tơdroăng púi vâ ai tíu ối dêi mâu kăn ƀô̆ kong chưk, ngế pêi cheăng gá hên”.

Tiâ mơnhên tơdroăng ki tôu tuăn dêi kuăn pơlê, pôa Nguyễn Ngọc Phúc, phŏ kăn hnê ngăn Vi ƀan kong pơlê Lâm Đồng ăm ‘nâi kong pơlê hiăng ai túa pơkâ hbrâ rơnáu ăm tơdroăng kố.

“Nôkố, ngin dế séa ngăn dâng 10 tíu ối vâ kăn ƀô̆ mâu kong pơlê troh pêi cheăng. Tíu ối, hngêi ăm mâu ngế pêi cheăng ối mê xuân dế séa ngăn, mơnhên tối vâ rak vế tơniăn ăm nhŏng o ai tíu ối, tíu kâ tơniăn. Rơxế ki to prôk lăm, ngin tơmiât tâng rơxế 50 tíu ‘nân mê Dak Nông kal dâng 10 toăng rơxế môi xôh, pơxiâm lăm a haia tĭng lơ kơxo hâi môi vâ nhŏng o to lăm pêi cheăng, Bình Thuận xuân ai dâng to lâi chât ngế, péa chât toăng rơxế. Ngin xuân pâ thế Chin phuh athế ai troăng pơkâ tŏng gum liăn ngân ăm mâu kăn ƀô̆ kố ai liăn vâ prôk lăm. Kong pơlê kô hnê mơhno tơdrêng ăm mâu kơvâ cheăng vâ ai tour rơxế chơ prôk lăm tro hâi chôu vâ kum ăm kăn ƀô̆ prôk lăm pêi cheăng a kong pơlê Lâm Đồng “.

Xuân kal vâ ‘nâi plĕng troh troăng pơkâ ‘mot tơkŭm tíu pêi cheăng râ kong pơlê, kuăn pơlê kong kơdrâm Vị Thanh, kong pơlê Hậu Giang hiăng tối tơdroăng kố ƀă pôa Trần Thanh Mẫn, Kăn xiâm hnê ngăn Kuô̆k hô̆i a rôh trâm kuăn pơlê. Trần Văn Trung a cheăm Long Mỹ tối:

“Kuăn pơlê phiu ro, loi khât a Khu xiâm pơkuâ tơdroăng kal kí, Khu pơkuâ ngăn Tơnêi têa, Kuô̆k hô̆i, Chin phuh kô hnê mơhno ƀlêi chiâng rôh kăch măng pro tơkŭm iâ ‘nâng khu xiâm pơkuâ tơdroăng kal kí. Pro ivá vâ mơnhông cheăng kâ, ‘mâi mơnhông tơdroăng cheăng lêng, gâk kring, mơdêk tơdroăng rêh ối Kuăn pơlê”.

Tiô kuăn pơlê Nguyễn Thị Kim Trúc a pơlê kong kơdrâm Vị Thanh, rôh kăch măng kố ôh ti xê to gum pro tơkŭm iâ kơ koan cheăng tơnêi têa mê ối mơdêk klâ xoăng râ, xoăng hnoăng pơkuâ rơdêi tâ, pro tơ’lêi hlâu ăm khu kăn pơkuâ kong pơlê mơnhông hnoăng cheăng hbrâ rơnáu tung pơkuâ ngăn.

“Tơmiât troh  mơjiâng môi khu pơkuâ tơdroăng kal kí iâ tơkŭm, pơkuâ rơkê plĕng, rak tơniăn môi tiah môi tung tơdroăng hnê mơhno, pơkuâ, pêi pro châ tơdroăng pơkâ thế mơnhông dêi tơnêi têa tung hneăng ki nếo. Tơdroăng kố xuân tơtro ƀă troăng tơmiât pêi pơhlêh dêi hên kong têa tung lâp plâi tơnêi”.

Tơmâng xo mâu rơkong tơpui tối dêi kuăn pơlê, pôa Trần Thanh Mẫn, Kăn xiâm hnê ngăn Kuô̆k hô̆i hiăng tối ăm kuăn pơlê ‘na troăng hơlâ dêi Đảng ‘na rôh kăch măng tơkŭm pro iâ kơ koan cheăng tơnêi têa dêi khu pơkuâ tơdroăng kal kí. Kăn xiâm hnê ngăn Kuô̆k hô̆i tối nhên, kố cho môi rôh kăch măng kân tá hâi chói ai vâ tơkŭm pro iâ kơ koan cheăng tơnêi têa, rak vế tơniăn kơ koan pêi cheăng rơdêi, tơƀrê, xêt. Xua tơdroăng ki ‘mot tơkŭm kơ koan cheăng kố ƀiên chê̆ nếo mâu kơxô̆ liăn ‘no pêi cheăng ăm pơlê pơla, rak vế tơniăn cheăng lêng, gâk kring, ai liăn ngân vâ mơjiâng khu pơkuâ tơdroăng kal kí krúa rơdêi.

“Chin phuh kơdroh ƀiên chê̆ mê pin nếo ai liăn ngân vâ ‘no pêi cheăng ăm mơnhông. La ngiâ ah kô pơtroh ăm Kuô̆k hô̆i hơnăm hriâm 2025-2026 kơdroh nâp liăn hriâm 30 rơpâu rơtal. Nôkố dế tơpui cho tung tíu pêi cheăng kông lâ̆p, chiâng vâ po ôh ti xê kông lâ̆p vâ tơdroăng hriâm troh la ngiâ ah athế gum. Hâi hnah trâm mâ kuăn pơlê, pôa Tô Lâm, Kăn xiâm pơkuâ hnê ngăn cheăng Đảng pơkâ thế Hà Nội khế 9 kố hbru liăn ăm hok tro kâ hmê a kơhâi dế. Kố cho tơdroăng pơkâ pêi xiâm dêi Đảng, Tơnêi têa pin cho athế ai hnoăng cheăng pôu râng rak ngăn kuăn pơlê ‘na tơdroăng rêh ối liăn ngân, tuăn mơno”.

Rôh trâm mâ kuăn pơlê a Lâm Đồng ƀă Hậu Giang hiăng mơhno nhên tơdroăng ki kal vâ ‘nâi, tơdroăng tôu tuăn dêi kuăn pơlê na mâu tơdroăng ki pơhlêh kân dêi khu tơrŭm kơ koan cheăng tơnêi têa, tơdrêng amê hlối pơtroh tơdroăng loi a troăng pơkâ, troăng tŏng gum dêi Đảng, Tơnêi têa. Tơdroăng ki pơhlêh nếo, ‘mot tơkŭm kơ koan cheăng tơnêi têa cho troăng pơkâ tung la ngiâ vâ mơdêk ki tơƀrê xêt tung tơdroăng pơkuâ ngăn tơnêi têa. Mâu tơdroăng ki tơpui tối dêi kuăn pơlê kô cho ivá mơhnhôk kal vâ tung pơla pơhlêh kơ koan cheăng châ tơbleăng tơƀrê, ai pơxúa, xua môi plâi tơnêi pơhlêh nếo ƀă mơnhông tŭm têk tung chal ki nếo.