Nôkố, kong pơlê Dak Lak ai lối 1.060 ngế ki châ kuăn pơlê loi kơhnâ rơkê, ối tung 49 hdroâng kuăn ngo rêh kâ ối a kong pơlê. Vâi cho mâu ngế ki djâ troăng ahdrối, hlê plĕng khôi túa tơlá, tuăn mơno tơchĕng tơmiât dêi vâi krâ kuăn pơlê, cho tíu hơgiên hiâm mơno dêi mâu pơlê cheăm; cho kông tơdjêp pơla kuăn pơlê ƀă kăn pơkuâ, kơhnâ veăng mơnhông cheăng kâ rêh ối pơlê pơla, rak vế gâk kring tơniăn, plâ mơdât mâu tơdroăng tơchĕng vâ pro tơdroăng ôh tá tro ‘ló dêi mâu khu ‘mêi, veăng gum mơnhông tơniăn cheăng kal kí a kong pơlê.

A rôh trâm mâ, mâu ngế ki kố hiăng tối ki rơkê tung cheăng hnê mơhnhôk, pro pơlĕm, mơjiâng thôn pơlê nếo, mơhnhôk droh rơtăm pro mố đô̆i. Pôa Y Tum Ayun, ngế ki châ kuăn pơlê loi ƀuôn Ea Tuk, cheăm Čư̆ Pơng, tối tiah kố tơdroăng ki môi tuăn tung kuăn pơlê cho tơdroăng ki rak vế krá tơniăn vâ mơjiâng pơlê cheăm phâi hơtôu, hơniâp lĕm. Xua mê, rêm ngế krê kal mơeăm tơrŭm, tơdjuôm ivá mơjiâng pơlê cheăm.

“Pơtối rơtế ƀă Đảng, kăn pơkuâ kong pơlê mơjiâng pơlê cheăm tung tơdroăng mơnhông cheăng kâ, tơniăn gâk kring cheăng kal kí, tơniăn tung pơlê pơla a kong pơlê, hnê tối, hnê hriâm ăm vâi krâ kuăn pơlê ‘na mâu tơdroăng ki nếo, tơtro, mơhnhôk vâi krâ kuăn pơlê pêi cheăng kâ, păn rak ăm kuăn hriâm, kơhnâ mơeăm xut tah kơklêa kơdroh kơtiê”.

Mâu kăn xuân tơpui tơno, hnê tối túa pêi cheăng kâ tung mơnhông hiâm mơno hbrâ kơchăng, tơplâ mơdât mâu tuăn tơchĕng vâ pro mâu tơdroăng ôh tá tro, pro tơklâ tơtrâ tơnêi têa dêi mâu khu ‘mêi, thăm mơnhông tơdroăng tơrŭm ƀă khu lêng ƀă kuăn pơlê.

Tơpui a rôh trâm mâ, Đăi tă Niê Ta, ngế pơkuâ Khu pơkuâ ngăn lêng kong pơlê Dak Lak mơnê mâu tơdroăng veăng tŏng gum kân, kơnía dêi mâu krâ pơlê, ngế pơkuâ thôn, ngế ki châ kuăn pơlê loi ƀă hnoăng cheăng lêng, gâk kring kong pơlê. Tơdrêng amê hlối pơkâ thế ngế ki châ kuăn pơlê loi pơtối tơrŭm lĕm tro pơla luât tơnêi têa ƀă khôi túa tơlá, rơkê tung hnê tối, mơhnhôk vâi krâ kuăn pơlê.

“ ‘Nâi nhên troăng hơlâ, tơdroăng pơkâ dêi Đảng, luât Tơnêi têa, tơrŭm lĕm tro pơla luât tơnêi têa ƀă khôi túa tơlá vâ hnê tối mơhnhôk kuăn pơlê rêh ối ƀă pêi cheăng tiô luât ƀă tơdroăng luât pơkâ. Hnê tối, hnê hriâm mơhnhôk vâi krâ kuăn pơlê mâu hdroâng kuăn ngo tơná pôi tá tơmâng, pôi tá loi mâu rơkong hnê tối ôh tá tro, hêak dêi mâu khu ‘mêi pro tơ’nhiê troh gâk kring tơnêi têa, hnoăng pơkuâ dêi Tơnêi têa”.

Rôh kố, Khu pơkuâ ngăn lêng kong pơlê Dak Lak hiăng diâp mơéa khê̆n kơdeăn 30 ngế krê kơhnâ rơkê tung pêi pro hnoăng cheăng lêng, kong pơlê hơnăm 2025, veăng gum mơjiâng tơdroăng cheăng lêng tung tâi tâng kuăn pơlê.