Pôa Đỗ Văn Chiến, Phŏ Kăn hnê ngăn hnê mơhno má môi Kuô̆k hô̆i lăm pôu, diâp kơxuô tơmeăm Trung thu a Nghệ An
Thứ tư, 10:45, 23/09/2026
Tơplôu: A Sa Ly/VOV
Tơplôu: A Sa Ly/VOV
VOV.Xơ Đăng - Kơxê lơ 22/9, lăm pôu, diâp kơxuô tơmeăm ƀă rơkâu Têt Trung thu mâu vâi o phô̆m vâ xông kân, vâi hdrêng a Tíu xiâm tŏng kum vâi hdrêng Nghệ An, pôa Đỗ Văn Chiến, Phŏ Kăn xiâm hnê ngăn Kuô̆k hô̆i pơkâ thế mâu khu râ kăn pơkuâ hnê ngăn cheăng Đảng, khu râ kăn pơkuâ, mâu khu râ, kơvâ cheăng kong pơlê Nghệ An pơtối tơmâng, rak ngăn tro tâ nếo ăm vâi hdrêng; pôi tá ăm tơdroăng rêh ối pá puât pro hía tơdroăng châ hriâm tâp, păn roăng tơdroăng pói vâ.
Pôa Đỗ Văn Chiến, Phŏ Kăn xiâm hnê ngăn Kuô̆k hô̆i khĕn kơdeăn tơdroăng tơmâng ngăn dêi kong pơlê Nghệ An ƀă tơdroăng rak ngăn, rak vế ƀă hnê hriâm vâi hdrêng, malối cho vâi hdrêng ai tơdroăng rêh ối pá puât. Lâp kong pơlê nôkố ai vâ chê 8.000 ngế vâi hdrêng ai tơdroăng rêh ối pá puât châ tơmâng ngăn, tŏng kum ƀă hên túa. Mâu túa rak ngăn, păn roăng ƀă tŏng kum vâi hdrêng rế hía rế hên túa, tơtro ƀă tơrêm tơdroăng ki ai khât.
Pôa Đỗ Văn Chiến, Phŏ Kăn xiâm hnê ngăn Kuô̆k hô̆i púi vâ mâu vâi o đi đo kơhnâ hriâm tâp, kơhnâ, tơrŭm, pêi pro lĕm tro Pơkâ 5 dêi Pôa Hồ hnê; ôh tá tô tuăn 'na tơdroăng rêh ối mê kal ai tơdroăng loi tơngah, ivá ƀă tơdroăng pói vâ 'na la ngiâ.
Viết bình luận