Tiô Kăn xiâm hnê ngăn Kuô̆k hô̆i, bu klêi kơ’nâi vâ chê 4 khế pêi cheăng tiô túa kăn pơkuâ péa râ, ối ai mâu tơdroăng ki tá ối ‘ro, tá hâi tơƀrê tơdroăng ki xoăng kơvâ cheăng, hnoăng cheăng pơla rêm râ ối tá hâi tơdâng, tá hâi tơdrăng, ối ai mâu mơéa pơkâ ‘na luât, mơéa tá hâi châ ‘mêng rơnêu teăm tơdrêng, trâm pá tung mâu kơvâ tơnêi tơníu, chêh pro, kong prâi tơnêi tíu, hngêi ối tơnêi pêi kâ, kơvâ cheăng chêh pơ’leăng mâ mơngế.

Pôa Trần Thanh Mẫn, Kăn xiâm hnê ngăn Kuô̆k hô̆i tối tiah kố, tơdroăng ki rơlối, lơ ối kal kăn ƀô̆, kong chưk; tíu pêi cheăng cheăm kŭn hâ ho, ôh ti ai veăng pêi cheăng. Laga, Tơnêi têa ăm phêp mâu kong pơlê tơleăng rơkê, tung tơdroăng ki tá hâi pro tíu pêi cheăng nếo, tá hâi ai tơdroăng vâ pêi cheăng, mâu khu tơrŭm, kơ koan cheăng dêi râ cheăm kô châ pro a mâu tíu ki phá dêi pó. Tung pơla mê, mâu kong pơlê athế kơtăng mơdêk rơdêi tơdroăng pơhlêh kơxô̆, xúa khoa hok kong ngê̆ vâ mơngế pêi cheăng iâ, la tơdroăng cheăng pêi tơniăn pêi klêi.

Kăn xiâm hnê ngăn Kuô̆k hô̆i xo pơtih, a Hneăng hôp má 9 kố nah, Kuô̆k hô̆i tơbleăng hên luât, tâng ôh tá xúa tơdroăng ki pơhlêh kơxô̆, xúa tuăn ngoâ kuăn mơngế pro AI mê kô ôh tá pêi klêi tơdroăng cheăng mơjiâng luât; tơdrêng amê hlối tối nhên, kố cho kăch măng ƀă mâu tơdroăng ki xơpá, pơloăng mơnúa ki ngế krê ki lâi ôh tá chiâng pêi mê athế pơtê.

Kăn xiâm hnê ngăn Kuô̆k hô̆i tối tiah kố, tung séa ngăn pêi pro tơdroăng kăn pơkuâ péa tá hâi ai tŭm troăng hơlâ séa ngăn kơtăng, chiâng tơdjâk troh mâu tơdroăng ki ôh tá pêi pro klêi apoăng, tá hâi mơnhông tơƀrê, malối cho a kong pơlê, thôn pơlê ƀă kơphô̆. Xua mê, râ kong pơlê athế séa ngăn đi đo râ cheăm, ối kal klâi mê athế ‘mot tơ’nôm tơdrêng hlối ƀă tơdroăng ki kal cho:

Ôh ti xê kơbố ki ê cho Chin phuh, Khu xiâm ngăn kong pơlê, cheăm ƀă hnoăng cheăng dêi mâu kăn ƀô̆, mâu kong pơlê tơbleăng pêi mâu troăng hơlâ pêi tơdâng tơ’mô tơkŭm tung mâu tơdroăng ki pơhlêh chêh pro mơéa, mơdêk ivá tŏng gum liăn ngân. Môi cho athế pêi pro klêi tơdroăng pơkâ luât, hnê pêi pro. Nôkố luât mê pin hiăng ai tŭm, u ối cho tơdroăng pơkâ hnê mơhno. Má péa cho pro tiah lâi chêh pro mơéa ‘mêi pơhlêh pơkâ luât athế nhên vâ xoăng râ xoăng hnoăng pơkuâ môi tiah nôkố. Má pái cho séa ngăn, ‘mâi pơhlêh ƀiên chê̆ kăn ƀô̆, pêi pro séa ngăn ivá pêi cheăng dêi mâu kăn ƀô̆ vâ xoăng cheăng tia lâi ăm tơtro, kơdroh pêi hên kơvâ cheăng, la ôh tá rơkê”.

Pakĭng mê, athế hnê mơhno ăm mâu kong pơlê vâ pêi pro séa ngăn ivá cheăng dêi mâu kăn ƀô̆, xoăng tơdroăng cheăng tơtro; rĕng mơjiâng mâu tíu pêi cheăng kông lâ̆p, tối tơbleăng tơdroăng cheăng a cheăm, tơdrêng amê hlối mơhnhôk khu mơdró kâ ôh ti xê Tơnêi têa veăng; mơdêk ivá cheăng dêi mâu kăn ƀô̆, tơkŭm po hnê tơ’nôm tơdroăng cheăng ăm kăn ƀô̆; thăm mơnhông ivá Khu séa ngăn kuăn pơlê a kong pơlê, athế tơkŭm po đi đo mâu rôh hôp ƀă kuăn pơlê vâ mơnhên tối tơdroăng cheăng, tơdrêng amê hlối thăm mơnhông tơdroăng ki séa ngăn.

Malối, sap ing nôkố troh mơ’nui hơnăm kal mơhnhôk tơlo liăn ‘no pêi cheăng krê, ‘mêng rơnêu tíu pêi cheăng, malối cho râ cheăm. Nôkố xuân ối ai dâng 2 rơpâu to tíu pêi cheăng tá hâi châ tiô pơkâ dêi tơdroăng cheăng vâ.

‘Na ki xiâm pơkâ pêi mơnhông cheăng kâ rêh ối pơlê pơla, pôa Trần Thanh Mẫn, Kăn xiâm hnê ngăn Kuô̆k hô̆i tối tiah kố kal rĕng ‘no liăn cheăng tơdjuôm; tơmâng ngăn troh thăm mơnhông, la athế krá tơniăn; kơvâ liăn ngân, hngêi trăng tơnêi tơníu, yă mêa athế châ mơdât; thăm mơnhông pơhlêh kơxô̆ ngiât, pơhlêh kơxô̆, thăm mơnhông ki rơkê plĕng tung pêi cheăng, mâu ngế pêi cheăng athế rơkê vâ cheăng ăm mâu tơdroăng pơkâ pêi thăm mơnhông.

Ƀă mâu tơdroăng pơkâ pêi ki Đảng hiăng mơ’no ăm rêm hneăng pơkâ pêi nhên, tiô Kăn xiâm hnê ngăn Kuô̆k hô̆i, tơdroăng ki kal má môi cho athế rak tơniăn ‘na cheăng kâ kân, thăm mơnhông cheăng kâ athế tro ƀă tơdroăng tơniăn cheăng kâ kân, tŏng gum tơdroăng rêh kâ ối ăm pơlê pơla; pơhlêh nếo túa thăm mơnhông sap ing mâu tơdroăng pơkâ pêi kân rơdâ chiâng tơdroăng pơkâ pêi trâu hngế, mơdêk pơhlêh kơxô̆, mơnhông cheăng kâ tiô túa ki tŭm têk, ai pơxúa, tơkŭm tung pái tơdroăng ki xiâm: vêh pơkâ kơvâ cheăng pêi, kơvâ cheăng pêi tiô troăng mơnhông ki tơƀrê dêi mâu tơdroăng cheăng; vêh pơkâ chiâng cheăng kâ, mơdêk ivá pơkuâ djâ dêi cheăng kâ ki tơnêi têa, la ngiâ kố ah Khu xiâm pơkuâ tơdroăng kal kí kô ai Pơkâ ‘na cheăng kâ tơnêi têa; vêh pơkâ kơpong tơnêi tơníu ƀă ‘no liăn cheăng tơdjuôm.

Kăn xiâm hnê ngăn Kuô̆k hô̆i tối rơdêi, vâ pêi châ mâu pơkâ pêi kố athế mơnhông tơƀrê ‘na troăng hơlâ pơkâ, Chin phuh, Kuô̆k hô̆i athế séa ngăn, tŏng gum tơdroăng ki xơpá, mơdêk ivá pơkuâ dêi kơ koan cheăng Tơnêi têa. Tối nhên um kơchuâ tâi tâng ‘na cheăng kâ dêi tơnêi têa pin gá eăng khât, tiô Kăn xiâm hnê ngăn Kuô̆k hô̆i, ƀă mâu tơdroăng ki tá hâi pêi klêi mê ôh ti xê kơbố ki ê, rêm ngế kăn ƀô̆, đảng viên athế thăm mơnhông cheăng kal kí, hiâm mơno tơmiât pêi vâ rơtế ƀă kuăn pơlê krá rơdêi hiâm mơno loi ăm ơnêi têa mơnhông.