-Ô jâ, kơ’nâi 5 hơnăm tơbleăng pêi tơdroăng Tơkêa bro 8, jâ kô tối ăm ‘nâi tơdroăng ki pêi tơƀrê ƀă mâu tơdroăng vêh pêi lĕm tâ tung tơplâ tơbleăng pêi tơdroăng tơkêa bro mê ti lâi?

Jâ Nguyễn Thị Minh Hương: “Ki ăm hlo tơƀrê dêi tơdroăng Tơkêa bro 8 ai 9 tơdroăng pơcháu pêi mê hiăng ai 4 tơdroăng pơcháu pêi châ tơƀrê ƀă luâ hên tâ, thăm nếo ai mâu pơkâ pơcháu pêi châ luâ 200%. Ối 5 tơdroăng pơcháu pêi, ngin tối hdrối mơni kô pê klêi a mơ’nui hơnăm 2025, tơkéa vâ tối cho tâi rôh má 1 kô châ tơƀrê. Bú ối môi tơdroăng pơcháu pêi  tê ki pá  vâ pê klêi. Tơdroăng mê ăm hlo ki tơƀrê dêi tơdroăng tơkêa bro, ƀă ki hên cho mâu tơdroăng pơcháu pêi châ tơƀrê ƀă luât tơdroăng pơkâ.

Mâu tơdroăng pơcháu pêi châ tơƀrê hên hmâ hlo rơtế pêi ƀă túa cheăng tung kuăn pơlê, pơtih túa pêi cheăng “Tíu ki loi nhoăm’’ lơ mâu Tôh hnê tối tung kuăn pơlê. Tơdroăng mê mơhno ki vâ môi tuăn dêi kuăn pơlê, ki xiâm hiăng gum mâu tơdroăng cheăng pêi dêi tơdroăng tơkêa bro châ tơƀrê tâ. Môi tung mâu tơdroăng cheăng pêi châ tơƀrê rôh má 1 dêi tơdroăng tơkêa bro cho veăng tơmâng dêi rêm khu râ kăn ƀă malối dêi kuăn pơlê. Ing tơdroăng ki veăng dêi kuăn pơlê hiăng gum mâu tơdroăng tơkêa bro tơtro ƀă tơdroăng kal vâ ƀă púi vâ dêi vâi, ing mê xuân gum ngin pơtối châ ‘mâi hơ’lêh mâu tơdroăng pêi pro ăm tơtro tâ’’

-Tung pơla hơnăm 2026- 2030 dêi Tơdroăng pơkâ dêi Tơnêi têa Tơdroăng tơkêa bro 8 kô ai mâu tơdroăng pơ’lêh klâi ƀă pêi ahdrối môi tiah lâi, ô jâ?

Jâ Nguyễn Thị Minh Hương: “Nôkố, vế hró hdrối dêi Tơdroăng pơkâ dêi tơnêi têa xuân ai mâu tơdroăng pơ’lêh. Laga, mơhé ti lâi, Khu ngăn vâi kơdrâi Việt Nam xuân tối tiah kố tơdroăng pêi tơdjuôm tơdrêng thế cho tơdroăng ki pêi ôh tá pơtê tung tâi tâng mâu tơdroăng pêi pro dêi Tơdroăng pơkâ tơnêi têa ‘na mơnhông cheăng kâ pơlê pơla kơpong kuăn ngo ƀă kong ngo. Tơdroăng mê vâ tối, mơhé ai Tơdroăng tơkêa bro 8 há lơ ôh tá ai tơdroăng tơkêa bro 8, mâu tơdroăng cheăng pêi pro xuân kal pêi tơdrêng ƀă pơla vâi kơdrâi kơnốu.

Pơtih, ƀă tơdroăng mơnhông cheăng kâ pơlê pơla, xuân ai mâu túa pêi cheăng tŏng gum krê ăm vâ kơdrâi, môi tiah mâu khu pêi cheăng tơrŭm lơ mâu khu mơdró xua mâu kơdrâi pơkuâ. Lơ ƀă mâu tơdroăng ki ê ai tơdjâk troh ’na rak ngăn ivá, thế ai mâu tơdroăng ki kal krê xêh vâ kum vâi kơdrâi rak vế ivá mo lĕm drêng ngế nôu kot mâ kuăn ngá, hnê mâu vâi nôu nâ ‘na păn roăng kuăn ‘nĕng. Tối mơgêi, ngin xuân mơhnhôk pêi tơdjuôm ƀă tơdrêng tung tâi tâng mâu tơdroăng cheăng dêi tơdroăng tơkêa bro ƀă hnê ăm vâi kơdrâi rế hlê plĕng xuân môi tiah mâu kăn ƀô̆ a pơlê cheăm”.

 -Hôm, mơnê kơ jâ!