Ki hdrối tâ, tối ‘na ‘no liăn roê mâu tơmeăm khoăng xúa tung tơdroăng hnê hriâm a kơpong ki xơpá, pôa Nguyễn Đại Thắng, ngế ki lo ing Hưng Yên pơkâ:

“Á pâ thế ‘mot tơ’nôm môi kơxô̆ liăn nếo tung Troăng 19 ‘Tơnêi têa kơjo gum xoăng kơxô̆ liăn vâ roê pro tơmeăm ƀă liăn tŏng gum ăm mâu tơdroăng ki xúa tung hnê hriâm a kơpong ki ai tơdroăng cheăng kâ xơpá, kơpong hngế hngo, kơpong tơkăng kong, têa kơxĭ chuăn rơlốu ƀă kơpong hdroâng kuăn ngo tung pơla pêi pro pơhlêh kơxô̆; rak tơniăn tơdâng tơ’mô pơla kơnốu ƀă kơdrâi tung pơla xúa tê mơdró tí tăng tíu chêh ‘măn mâu tơdroăng kal ‘na hnê hriâm ƀă hnê cheăng”. Tiah mê kô mơnhông tơƀrê tung tơbleăng pêi troăng hơlâ xuân môi tiah tơdroăng ki tơdâng tơ’mô tung tơdroăng xúa kong ngê̆ a mâu tíu hnê hriâm”.

‘Na Luât ki ‘mâi pơhlêh, ‘mot tơ’nôm mâu tơdroăng dêi Luât Hnê hriâm, ki xiâm cho pơkâ ‘mâi pơhlêh, ‘mot tơ’nôm tiô troăng Tơnêi têa gum ăm mơéa hriâm xúa tâi tâng tung lâp tơnêi têa. Jâ Nguyễn Thị Mai Thoa, ngế lo ing Hưng Yên tối túa tơmiât:

“Khu ki rah chêh kal rah xo tơdroăng ki mơhno tro má môi tung mâu mơéa vâ xing xoăng chiâng mơéa hriâm nếo ai tơdroăng ki pơưhlêh, klâ xoăng tơdjêp tơtro mê mơéa nếo kô mơnhông châ tơdroăng pơkâ rơdêi, ‘mâi mơnhông châ tơdroăng ki ối ‘ro dêi rêm khu mơéa hdrối nah, pro tro má môi tơdroăng ki xúa mơéa hriâm vâ tơbleăng tơdroăng ki hriâm”.

Tung pơla mê, ai mâu kăn ối tôu tuăn pơkâ thế pơxiâm sap ing hơnăm 2026 ai 1 khu mơéa hriâm tơdjuôm ăm lâp tơnêi têa cho tơpréa luâ râ. Hlo mâu tơdroăng tơpui tối dêi mâu kăn, pôa Nguyễn Kim Sơn, Ngế xiâm ngăn hnê hriâm ƀă hnê mơjiâng tuăn ngoâ rơkê ăm ‘nâi:

“Tơdroăng kố Khu xiâm hiăng chêh pro mơéa. Tung mơéa ki chêh pro mê hiăng ai mâu túa pơkâ xúa ƀă kô pâ rơkong ing kăn xiâm pơkuâ hnê ngăn cheăng Đảng, pơtroh ăm Ngế pro xiâm hnê ngăn tơnêi têa kĭ. Khu kô mơeăm rĕng má môi cho tung khế 11 kô ai túa pơkâ tối ki păng ‘nâng ƀă kô tơbleăng tối ăm. Á pâ tối rơdêi kô teăm”.

Tơdroăng ki kal tung kơxop mơéa luât hnê hriâm ‘mâi pơ’hlêh cho tơdroăng ki mơjiâng troăng hơlâ hnê hriâm kuăn pơlê tơ’lêi, liên thông, ‘mot tơ’nôm túa hnê cheăng a rôh hriâm trung hok, ăm phêp hok tro ki nếo hriâm klêi trung hok phôh thong, rế châ hnê cheăng pêi, pro mơéa tơ’lêi hlâu ing tơdroăng ki tah lôi ƀâng hiăng plah tơ’noăng râ má pái ƀă pơhlêh hnoăng hbru ƀâng plah tơ’noăng râ má pái sap ing Kăn pơkuâ Khu ngăn hnê hriâm ƀă hnê mơjiâng tuăn ngoâ rơkê chiâng ăm Ngế ki pơkuâ hngêi trung kĭ ăm.

Jâ Nguyễn Thị Việt Nga, ngế ki lo ing Hải Phòng tối ki khât tung tơdroăng hnê hriâm phôh thong gá chía hngăm, chiâng tơdjâk troh tơdroăng ki hnê tơ’nôm, hriâm tơ’nôm xua thái cô ôh tá teăm hnê tâi mâu tơdroăng ki vâi hlê tung chôu hriâm a lâm. Tung pơla mê, hok tro chiâng ôh tá châ hnê ăm mâu tơdroăng ki thái cô kal vâ hnê ƀă tơdroăng ki xúa tung pơlê pơla:

“Pakĭng mê mơéa hriâm mê tơdroăng hriâm xuân cho tơdroăng ki kal. Ai thai cô hnê toán tối tiah kồ hok tro chiâng vâ pro phương trình, bất phương trình, la lăm a kơchô ăm mâu vâi o vâ riân, riân tung tuăn drêng roê kơchâi, roê ká mê ôh ti ‘nâi. Tơdroăng ki vâi hriâm ‘na rêh ối, kih năng dêi mâu vâi o gá ‘ro khât. Mê drêng tơkŭm pơkâ tâi tơdroăng, pro môi to mơéa hriâm athế tơtrŏng troh tơdroăng kố”.

Tơpui tơno a tôh, mâu kăn Kuô̆k hô̆i xuân môi tuăn ƀă tơdroăng ki tah lôi túa pơkâ diâp ƀâng hiăng plah tơ’noăng râ má pái trung hok phôh thong,  bu pơkâ mơnhên học ƀă hiăng hriâm klêi trung hok phôh thong xua ngế ki pơkuâ hngêi trung diâp. Pơkâ kố tơtro ƀă rôh hnê hriâm troh râ má péa, tơ’lêi hlâu pro mâu mơéa, kơdroh tơdroăng ki pá tung rôh tơ’noăng ăm hok tro.