Bêng Tiến Thành, kong pơlê Lâm Đồng tơrŭm rơtế mâu khu tŏng gum ƀă khu mơngế ki lăm gum mơngế pá puât tơkŭm po tơdroăng ‘’Kơmăng xah hêi ro khế mơniâ’’ ăm mâu vâi o ối kŭn ai tơdroăng rêh ối pá puât tung bêng. Tung tơdroăng pêi pro, mâu vâi hdrêng hiăng châ ngăn axoâng prếo pơxiâm po hâi xah hêi ro, ngăn mâu tơdroăng rơhdruê xoâng xua tơná mâu pú hmâ hok tro mơđah tơbleăng ƀă tơmâng hơ’muăn ‘na tăm Cuội – nâ Hằng Nga. Roh kố, teăng mâ khu râ kăn pơkuâ bêng Tiến Thành ƀă mâu tíu pêi cheăng tŏng gum hiăng diâp ăm lối 1.550 kơxuô tơmeăm, tâi tâng ki kơnâ lối 125 rơtuh liăn ăm mâu vâi o ai tơdroăng rêh ối pá puât phiu ro Têt Trung thu. A hngêi Trung Râ má môi Phan Thanh 2 (Tíu má 2), cheăm Hồng Thái, kong pơlê Lâm Đồng, teăng mâ Mũi Né Bay Resort xuân hiăng diâp 100 kơxuô tơmeăm Trung thu ƀă 20 hnoăng ƀaoh hiêm khăm pơlât ăm mâu vâi o hok tro hdroâng kuăn ngo ai tơdroăng rêh ối pá puât. Mâu kơxuô tơmeăm kố cho tơdroăng ki mơhnhôk teăm tơdrêng, mơhnhôk hiêm mơno hriâm tâp dêi mâu vâi o tung hơnăm hriâm nếo.

Khu pơkuâ ngăn đoàn, Khu ngăn pơkeăng pơlât kong pơlê Quảng Ngãi rơtế ƀă mâu tíu pêi cheăng nếo tơrŭm tơkŭm po tơdroăng “Ro Têt Trung thu 2025” a Plông kân 16/3, bêng Kon Tum. Lối 130 ngế vâi hdrêng dêi bêng Kon Tum ƀă Tíu xah hêi hriâm tâp Droh rơtăm mâu phô̆m vâ xông kân Diên Hồng veăng mơđah hơdruê xoăng, djâ vế hên mâu ƀai hơdruê xoăng ki ro, môi tiah dêi Têt Trung thu.

Mâu ƀai hơdruê ô eăng Pôa Hồ, tơrŭm pơla mơngế tung rơpŏng hngêi rơtế ƀă mâu túa kơxuăng djâ tơdroăng ki lĕm dêi túa lĕm tro bêng pro chiâng tơdroăng ki hơniâp lĕm. Túa ki kơxoăng prếo, têk on đê̆ng ƀă malối cho tơdroăng ki po mơđah “Tơdroăng ki ai mâ dêi mâ khế” cho ki xiâm, tơ’mot vâi hâk vâ, hơniâp ăm vâi hdrêng ƀă kuăn pơlê kơpong tíu pêi cheăng peăng mâ hâi Lâ dêi kong pơlê. Ƀă inâi “On kơđĕng tơdrong têk eăng tơdroăng púi vâ”, tơdroăng kố hiăng mơhnhôk tơlo châ lối 800 rơtuh liăn sap ing mâu kơ koan, tíu pêi cheăng, khu mơdró kâ diâp 1.800 kơxuô tơmeăm Trung thu ƀă 300 hnoăng liăn hriâm rơkê diâp ăm vâi hdrêng ki mơeăm tơkâ luâ xơpá, hriâm rơkê a kong pơlê.