Hdrối mê, hâi lơ 18/9, pôa Phan Văn Sơn, kuăn pơlê a kong pơlê Gia Lai, vêh pâ tơdroăng nah châ hlo mâu kơxêng ƀă um mô đô̆i mơngiơk ngiêt drêng chiâ klôh a kơpong kố a khế 5/2022.

Drêng hlo Đô̆i K52 tơkŭm po ti tăng kơxêng kiâ mố đô̆i, pôa Sơn hiăng tối ăm 'nâi tíu ki mơni ai kơxêng kiâ mố đô̆i. Khu ki ai tơdjâk rĕng mơnhên ƀă tơkŭm po ti tăng, ing mê châ hlo mâu kơxêng kơpeăng chêng, kơxêng kơpeăng kŏng, kơxêng ko, kơxêng krâng rơtế ƀă mâu tơmeăm ki ê dêi mố đô̆i. Kơxêng ki tá hâi 'nâi inâi. Mâu kơ koan ki ai tơdjâk kô pơtối pro klêi hồ sơ, xo  kơxêng, xâk séa ngăn ADN vâ mơnhên inâi mố đô̆i.