Teăng mâ Chin phuh, pôa Nguyễn Kim Sơn, Ngế xiâm ngăn hnê hriâm ƀă hnê mơjiâng tuăn ngoâ rơkê pơchuât tơbleăng troăng hơlâ ‘no liăn roê mâu kế tơmeăm xúa tung tơdroăng pơkâ pêi tơnêi têa nôkố, mơdêk ki rơkê tung ‘no liăn pêi cheăng hnê hriâm ƀă hnê mơjiâng tuăn ngoâ rơkê hneăng hơnăm 2026-2035 ai tâi tâng mâu kơxô̆ liăn mơhnhôk veăng tơlo vâ pêi pro Tơdroăng tung hneăng hơnăm 2026-2035 dâng 580 rơpâu rơtal.

Séa ngăn tơdroăng ki kố, Vi ƀan pơkuâ Kuô̆k hô̆i pơkâ thế kơ koan chêh pro mơéa kal hriăn, tơmiât nhên mâu tơdroăng kal, rak tơniăn pêi pro pơhlêh pơkâ pêi troh hơnăm 2030 ƀă 30% mâu hngêi trung hriâm mầm non, hnê hriâm phôh thong ăm nâl Ănglê chiâng nâl tơpui ki má péa ƀă mơdêk hriâm tâi tâng a hơnăm 2035.

Tơdjâk troh tâi tâng kơxô̆ liăn mơhnhôk tơlo vâ pêi pro Tơdroăng pơkâ tung hneăng 10 hơnăm sap ing 2026-2035 cho lối 580 rơpâu rơtal liăn tiô mơéa pơtroh dêi Chin phuh, Vi ƀan pơkuâ Kuô̆k hô̆i pơkâ thế kal xoăng liăn tro ƀă tơdroăng pơkâ pêi ƀă ivá ai liăn, rak tŭm tơdroăng pêi pro ki xoăng tŭm, tơƀrê. Séa ngăn tơdroăng ki mơhnhôk tơlo mâu kơxô̆ liăn pa gong vâ kơdroh iâ ki hngăm chê̆n liăn ngân, mơdêk rơdêi ‘no liăn pêi cheăng tiô túa ki tơrŭm tơdjuôm krê PPP tung mơjiâng pro hngêi trung hriâm, kơƀăng tăng, kế tơmeăm xúa tung hriâm tâp.

Ăm rơkong veăng tơpui tối ‘na tơdroăng kố, Pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế athế ai troăng ngăn ki xŏn, tiô tối hdrối troăng mơnhông dêi pơlê pơla, dêi mâu kong têa vâ xúa ngế pêi cheăng tung la ngiâ, pâ thế ‘na kih thuât, tơdroăng tơpui, pêi cheăng rơkê vâ rak tơniăn tŭm tơdroăng ki kal ƀă ki tơƀrê ton xŏn, tung tơdroăng ki pêi pro hên; tơkŭm tung mâu tơdroăng pêi ki kal, pêi tơdrêng môi tiah pơhlêh kơxô̆, hnê cheăng pêi rơkê, hnê hriâm a kơpong hngế hngo, kơpong kuăn pơlê hdroâng kuăn ngo.

Pakĭng mê kal hlê nhên ki xiâm ƀă kơxô̆ liăn ngân dêi tơdroăng pơkâ pêi ƀă mâu tơdroăng pơkâ, tơdroăng tơkêa hmâ pêi dêi Khu xiâm ngăn hnê hriâm ƀă Hnê mơjiâng tuăn ngoâ rơkê; mơnhên nhên ngế ki châ kơjo gum tơkŭm a kơpong ki xơpá, kơpong hdroâng kuăn ngo, hnê hriâm mầm non, hnê hriâm đăi hok, vâ ai troăng hơlâ ‘no liăn tơxâng.  Pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế:

“Mơjiâng troăng hơkâ ki lĕm tro vâ mơhnhôk mâu khu mơdró kâ, mâu khu tơrŭm, mâu ngế krê veăng ‘no liăn roê tơmeăm tung kơvâ hnê hriâm. Á tối tơdroăng kố mê gá kal, ƀă rak ngăn tung kơxô̆ liăn ngân tơnêi têa ôh ti ai to lâi ôh, mê pin pro tiah lâi ăm troăng hơlâ tơrŭm cheăng tơdjuôm krê PPP tung mơjiâng pro hngêi trung lâm hriam, ‘no liăn roê tơmeăm xúa tung hnê hriâm. Ai hên hngêi trung dêi kong têa ê ‘no liăn hên tung tơdroăng kố, vâ hok tro tung tơnêi têa ôh ti kal lo lăm hriâm a kong têa ê. Tâng rơkê lĕm mê vâi kuăn muăn pin la ngiâ ah chía kơdroh tâ kơxô̆ liăn nâp roê mâu kế tơmeăm ki kâ”.

Châ ‘nâi, a Hneăng hôp rôh má 10, Kuô̆k hô̆i kô ‘mâi rơnêu Túa pơkâ tâi tâng tơnêi têa hneăng 2021-2030, troăng ngăn troh hơnăm 2050, tung mê ai mâu tơdroăng kal châ pơhlêh troăng hơlâ pơkâ dêi Đảng, Tơnêi têa ‘na kơvâ cheăng hnê hriâm ƀă hnê mơjiâng tuăn ngoâ rơkê, tiô Kăn xiâm hnê ngăn Kuô̆k hô̆i pơchân vâ rak vế tơdroăng ki môi tuăn pơla tơdroăng pơkâ ƀă túa pơkâ tâi tâng tơnêi têa ƀă mâu luât ki tơdjâk troh; tơdrêng amê hlối pơkâ thế tơkŭm tá 3 tơdroăng vâ ví pôi tá bô bối khu ki chêh pro, tơdroăng ki kal ‘no liăn pêi cheăng, ngế ki pơtó tơ’mô tơƀrê. Môi xôh nếo Kăn xiâm hnê ngăn Kuô̆k hô̆i rơhêng vâ, tơdroăng kố ôh tá chiâng pro ton mê athế tơkŭm tung mâu tơdroăng kal xiâm, kal pei tơdrêng.

Pôa Nguyễn Khắc Định, Phŏ kăn xiâm hnê ngăn Kuô̆k hô̆i môi tuăn ƀă tơdroăng ki kal pơkâ tơdroaqng ƀă tối tiah kố tơdroăng pơkâ tơnêi têa cho mâu tơdroăng ki tơdâng ƀă tơnêi têa, athế tơkŭm pêi pro vâ pơhlêh tơƀrê tung hâi khế la ngiâ.

“Tung kố á hlo ai tơdroăng ki tơƀrê: môi cho hngêi trung lâm hriâm, kơƀăng tăn, péa nếo cho khoa hok kong ngê̆ ƀă pơhlêh kơxô̆, pái nếo cho tơdroăng ki tơpui nâl Ănglê. La á pói tơngah ai mâu tơdroăng ki ôh tá hlo chêh tối tung kơxop mơéa kố. Mê cho mâu tơdroăng pơkâ dêi pin pơttá tối cho hnê kuăn mơngế cho mơnhông tŭm têk. La hok ‘nâi tơdroăng tơdroăng klê mê ôh ti ‘nâi. Hnê chư tro ƀă hnê mơngế ƀă hnê cheăng. Mâu phô̆m vâ xông kân, vâi hdrêng pêi pro tro pơtăm tơdroăng Pôa Hồ hnê: Pâ tơnêi têa, pê kuăn pơlê, hriâm tâp rơkê, pêi cheăng rơkê. La hriâm mê ai vâi o rơkê, ai vâi o tá hâi rơkê, la pêi cheăng tá hâi rơkê”.

Xua mê, tiô pôa Nguyễn Khắc Định, Phŏ kăn xiâm hnê ngăn Kuô̆k hô̆i, rơtế ƀă tơdroăng ki hnê chư, hnê mơngế xuân athế xing xoăng mâu hngêi trung vâ rak vế tơniăn tro ƀăng tơnêi vâ mâu hngêi trung pêi pro mâu tơdroăng pơkâ ki ê vâ châ tơdroăng púi vâ mâu tơdroăng hriâm tâp tâi tâng ăm vâi o.

Tơpui tối leăng tơdroăng mâu ngế cheăng tung Vi ƀan xiâm Kuô̆k hô̆i tối, pôa Nguyễn Kim Sơn, Ngế xiâm ngăn hnê hriâm ƀă hnê mơjiâng tuăn ngoâ rơkê ăm ‘nâi, ‘na liăn ngân pêi pro tơdroăng, tung pơla pơkâ kĭ hên rôh, tơdroăng ki riâm tơmiât mâu liăn ngân, Khu xiâm ngăn liăn ngân hiăng riân nhên mâu liăn ngân ƀă Chin phuh hiăng pơtroh ăm Kuô̆k hô̆i mê hiăng tơmiât troh tơdroăng ki ai liăn ngân vâ pêi cheăng.

“ ‘Na séa ngăn mâu tơdroăng ki kal pơla luât, troăng hơlâ pơkâ xiâm tung tơdroăng pơkâ pêi. Ngin séa ngăn, la tơdroăng kố mê ki xiâm cho pêi pro châ tơdroăng púi vâ ‘na liăn ngân vâ tơbleăng mâu tơdroăng kal tiô troăng pơkâ pêi dêi Pơkâ 71. Pơtih Pơkâ 71 châ pơkâ pêi troăng hơlâ, pơkâ xiâm kố”.

Mâu rôh tơpui tơno a Rôh hôp rôh má 51 aqm hlo mâu tơdroăng ki kal dêi Tơdroăng pơkâ tơnêi têa ‘na pêi pro pơhlêh tung hnê hriâm hneăng hơnăm 2026-2035 dế hiăng châ pêi hên tơdroăng ki kal ‘nâi dêi kuăn pơlê: tơƀrê xúa liăn ngân lối 580 rơpâu liăn, ivá pêi cheăng mâu tơdroăng pơkâ pêi môi tiah hnê nâl Ănglê, pơhlêh kơxô̆, lơ rak vế tŭm tơmeăm xúa tung hnê hriâm ƀă tơdroăng hnê tŭm têk ăm hok tro.