Tiah mê, 1.100 rơtal liăn sap ing kơxô̆ liăn ki ‘măn kơdĭng dêi tơnêi têa hơnăm 2025 châ xoăng vâ pêi pro mâu tơdroăng cheăng ki kal pêi tơdrêng, môi tiah ‘mêng rơnêu hngêi trăng, ‘mâi mơnhông tơdroăng cheăng kâ, tŏng gum tơdroăng rêh ối ƀă rak vế tơniăn tơdroăng rêh kâ ối ăm pơlê pơla. (Tung mê: kong pơlê Khánh Hòa 150 rơtal, kong pơlê Lâm Đồng 300 rơtal, kong pơlê Gia Lai 150 rơtal, kong pơlê Dak Lak 500 rơtal).

Chin phuh pơkâ thế mâu kong pơlê hbrâ rơnáu pro tơdâng liăn ngân, tơdrêng amê hlối mơhnhôk veăng tơlo tơ’nôm mâu kơvâ cheăng ki ê vâ tơbleăng pêi tơƀrê, tro pơkâ, rak vế tơdroăng ki tơbleăng tơdrăng, tro. Pơkâ kố mơhno tơdroăng ki tơmâng ngăn, hnê mơhno teăm tơdrêng dêi Chin phuh tung tŏng gum kuăn pơlê kơpong têa kân lân lu, kơdroh ki tro lŭp, tơniăn tung rêh ối ƀă rĕng ‘mâi mơnhông cheăng kâ rêh ối pơlê pơla.