Xoăng râ pơkuâ châ ngăn cho khoă ki vâ mơnhông tơƀrê pêi pro tiô luât tung kơvâ pêi chiâk pêi deăng, malối cho a mâu kong pơlê ki ai túa pơkâ pêt tơmeăm a mâu ƀăng tơnêi ki kân rơdâ. Pôa Phạm Văn Hòa, Ngế ki lo ing Đồng Tháp, tối tiah kố tơdroăng ki pơcháu hnoăng ăm kong pơlê tung pơkuâ ngăn mơjiâng pro kế kâ xúa tung păn mơnăn mơnoâ í peâp cho kal khât, gum pro ‘nâng ‘nâi tâ tơdroăng ki chêh pro mơéa ƀă thăm mơnhông tơdroăng ki chiu pôu râng dêi hnoăng cheăng:

“Á pơkâ thế xoăng râ rơdêi tơdrêng hlối ăm kong pơlê ‘na tơdroăng xo tơvêh, hbru ăm mơéa mơnhên ai tŭm tơdroăng vâ mơjiâng pro kế kâ xúa tung păn mơnăn mơnoâ í peâp, ôh ti kal athế cho Khu xiâm. Pơcháu ăm Kăn hnê ngăn Vi ƀan râ kong pơlê châ hnoăng cho ngế ki hbru ăm phêp, xo tơvêh mơéa phêp, tâng tíu ki mơjiâng pro ai tŭm tơdroăng mê kong pơlê athế chiu pôu râng dêi hnoăng cheăng cho xiâm”.

Laga, rơtế ƀă tơdroăng ki diâp hnoăng, hên mâu kăn tối nhên kal thăm mơnhông ivá ƀă mâu ngế pêi cheăng a râ cheăm bêng, kong pơlê, malối cho tung khu pơkuâ ngăn mơnăn mơnoâ kong pơlê, cho tíu ki ối kal hên mâu ngế pêi cheăng klêi kơ’nâi klâ xoăng, ‘mot tơkŭm, pro lê lĕm kơ koan cheăng tơnêi têa. Jâ Chu Thị Hồng Thái, ngế ki lo ing Lạng Sơn tối nhên tíu ki ối hông tung khu pơkuâ ngăn mơnăn mơnoâ kong pơlê drêng hên cheăm, bêng ôh ti ai kăn ƀô̆ pêi cheăng, tung pơla kơxop mơéa mê pơcháu tơ’nôm hên tơdroăng cheăng hbrâ mơdât pơreăng troh râ cheăm. Jâ pâ thế kal ai pơkâ nhên ƀă khŏm pơklât thế ‘na tơdroăng ki xoăng khu cheăng ‘na rak ngăn mơnăn mơnoâ a mâu cheăm bêng, vâ rak vế tơniăn tơƀrê hbrâ mơdât pơreăng tung păn mơnăn mơnoâ.

“Ƀă luât mơnăn mơnoâ mê á ai pâ thế cho kơ koan chêh pro mơéa ƀă kơ koan séa ngăn xuân hriăn plĕng vâ mơ’no tối tơdroăng pơkâ cho mâu kong pơlê cheăm bêng pơklât thế ai ngế ki séa ngăn ‘na tơdroăng ki păn mơnăn mơnoâ. Ƀă mâu túa pơkâ a kơxop mơéa luât kố á hlo cho hên hnoăng cheăng dêi tơdroăng cheăng pêi ngăn mơnăn mơnoâ dêi râ cheăm bêng cho pơhlêh pơtroh vêh tâi a râ cheăm ki hdrối nah mê ai khu ngăn mơnăn mơnoâ, tíu pơlât mơnăn a râ tơring xếo. Nôkố ôh ti ai xếo mâu khu ki kố mê a râ cheăm kơbố pêi cheăng ki mê?”.

Ki khât gá ăm hlo, khu pơkuâ ngăn mơnăn mơnoâ a cheăm bêng chiâng vâ pơtih “cho tuăn, cho mâ, cho péa pâ chêng” dêi kơvâ păn mơnăn mơnoâ, tâng ôh ti bê tŭm mâu ngế pêi cheăng kô tơdjâk troh ôh ti ai kơbố tung séa ngăn pơreăng tâ tú. Xua mê, tơdroăng ki xoăng râ athế rơtế prôk ƀă troăng hnê mơhno nhên ‘na mâu ngế pêi cheăng, túa pơkâ ƀă hnoăng cheăng pôu râng dêi kăn pơkuâ kong pơlê, cheăm bêng.

Rơtế amê, jâ Nguyễn Thị Sửu, ngế ki lo ing Pơlê kong kơdrâm Huế tối tiah kố: Xoăng râ rơdêi ăm kong pơlê kal pêi pro tro ƀă troăng hơlâ xing xoăng môi tuăn, vâ rak vế tơdroăng ki tơdâng ƀă ví tơdroăng ki ôh tá tơdrăng tung hnoăng pơkuâ, malối cho tung kơvâ pêt tơmeăm ƀă pêi chiâk pêi deăng hưh cơ.

“Drêng tơkŭm môi péa Khu xiâm ngăn chiâk deăng ƀă Hyôh kong prâi, pin kal môi tuăn kơ koan xing xoăng vâ pơkuâ ngăn tơdrăng rơkê sap ing Tơnêi têa troh kong pơlê. Á pơkâ thế mơjiâng KHu ki xing xoăng Tơnêi têa ‘na Pêi chiâk pêi deăng Hưh cơ ƀă Sinh hok, pro kông tơdjêp hnê mơhno môi tuăn, ví tơdroăng ki rêm to kong pơlê pêi môi túa, pro chiâng ôh tá tơdâng tơ’mô ƀă ki tơƀrê gá iâ”.

Mâu rơkong tơpui tối dêi mâu kăn ăm hlo túa ki tơchĕng tơmiât tơdjuôm: Xoăng râ ôh ti xê cho pơcháu hnoăng, mê ối cho pơcháu hnoăng rế prôk ƀă tơdroăng xing xoăng, hbrâ mơdât ƀă chiu pôu râng hnoăng cheăng. Drêng kong pơlê châ thăm mơnhông hnoăng pơkuâ ngăn, hlối rơtế prôk cho athế ivá pêi pro, troăng hơlâ ‘măn rak mâu yưh liê̆u ki môi tuăn ƀă troăng hơlâ séa ngăn nhên vâ rak vế tơƀrê tung tơdroăng ki ai khât.