Mă đơ̆ng đĭ đei dôm jĭt sơnăm pơtăm pơkao rŭng reng, mă lei ‘nhŏng Lê Niê Minh Quân, tơ̆ xăh Cư Êbua, pơlei tơm Buôn Ma Thuột, dêh char Đắk Lắk oei tôch kơ tơtăm ăn pơyan pơkao sơnăm ‘nâu yua kơ ‘năr tơngiĕt păng kial lơ. Vă tang găn dôm tơdrong hiong răm yua đơ̆ng tŏ ‘mi kial pơm ăn kơ ‘long pơkao rŭng reng, ‘nhŏng Quân ‘măn lơ jơ năr răp hơlen, hơmet ming trong rong vei lăng vă pơm đei dôm pơkao rŭng reng ‘lơ̆ng hloh.

‘Nhŏng Quân roi tơbăt: “ Hrei ‘nâu tŏk bŏk khei ‘năr chă lơ lăng păng vei lăng rơnôp vă kơ đei dôm ‘măng pơkao tơlang dang ăi hloh ‘lơ̆ng hloh vă lơ bơngai hơiă păng răt lơ hloh”.

Kŭm hăm pơkao rŭng reng, đào, cúc đại đoá kŭm đei lơ ŭnh hnam tơ̆ Đắk Lắk rơih pơrŏ năr têt. Dôm kơchâ̆u cúc đại đoá kơjung 1m2 truh 1m5 đĭ jing ‘lơ̆ng đơ̆ng rŏng hloh 5 khei pơtăm. Khei ‘năr âu đei lăng jing gĭt kăl hloh vă tơchơ̆t tơdrong ‘lơ̆ng kŭm nhen kơjă tĕch đơ̆ng pơkao. Yua thoi noh, dôm ŭnh hnam pơtăm cúc đại đoá tĕch ăn năr Tết nhen ‘nhŏng Nguyễn Thanh Hùng, xăh Cư Êbua, pơlei tơm Buôn Ma Thuột, dêh char Đắk Lắk athei vei lăng mă pơ ‘lơ̆ng hloh. Bơ̆n hla jô, rơnôp pơkao ưh kơ ‘lơ̆ng gô đei sư kơsep hŭt đĭ, vă rong ăn dôm pơkao tih ‘lơ̆ng hloh.

‘Nhŏng Nguyễn Thanh Hùng tơroi: “ Khei ‘năr âu ‘noh jĭ khei ‘năr tuch luch kơna bơngai jang pơgar athei mă hơlen. Bơ̆n vei lăng ‘long pơkao pơm liơ vă kơ hla mă ‘lơ̆ng, pơkao athei rơgoh ưh kơ đei hơdrông, ưh kơ yă de vă pơkao ‘lơ̆ng hloh truh hăm tơpang ti bơngai yua. Bơngai yua đei 1 têt ƀĕnh kơmâu ‘lơ̆ng.”

Tơ̆ pơlei pơkao Khánh Xuân, phường Khánh Xuân, pơlei tơm Buôn Ma Thuột, dêh char Đắk Lắk, đơ̆ng blŭng khei 9 - 10 âm lịch, dôm bơngai jang pơgar hlôi pơtăm dôm kơ loăi pơkao kơđeh năr ƀĕnh kơ mâu nhen: Cúc mâm xôi, cúc vạn thọ, phong lữ thảo, ….vă tơtom tĕch năr Tết Nguyên đán. Yă Phạm Thị Kiều Diễm, bơngai jang pơgar Hà Mi, phường Khánh Xuân roi tơbăt, sơnăm ‘nâu, sư pơtăm 2.000 kơ châ̆u cúc mâm xôi. Mă đơ̆ng tŏ ‘mi kial ưh kơ gan ‘lơ̆ng mă lei hăm tơdrong hlôh vao đơ̆ng bơngai jang pơgar, truh dang ei, dôm kơchâ̆u pơkao oei bluh jing ‘lơ̆ng, ling lang pơm lăp hăm ‘meh vă pơkao tết.

Yă Diễm hơmĕng lơ̆m khei ‘năr  tơjê̆ Tết Nguyên đán anih tĕch mơdro gô hơnơ̆ng chơt hơiă păng hơnhăk ăn iŏk yua mŭk drăm sơđơ̆ng ăn bơngai pơtăm pơkao: “Pơtăm kŭm nhen rim sơnăm đĕch ưh kơ thim dăh mă tŏ sĕt ƀiơ̆. Tĕch tơ̆ anih tĕch mơdro kơjă kŭm sơđơ̆ng nhen rim sơnăm. Pơma atŭm tơmoi truh kŭm lơ. Đe sư kŭm năm lăng pơkao păng răt hloi. Bơngai jang pơgar kŭm ‘meh vă tơmoi truh hăm bơngai jang pơgar ‘noh bơngai jang pơgar tĕch đei lơ pơkao”.

Mă đơ̆ng tơƀơ̆p lơ mơmat tat yua đơ̆ng tŏ ‘mi kial ưh lơ ‘lơ̆ng, mă lei dôm bơngai jang pơgar tơ̆ Đắk Lắk oei hơdrin jang. Kơlih đơ̆ng pơtang ti hơgei đơ̆ng bơngai pơtăm pơkao gô tơgop pơm đei dôm tơmam ‘lơ̆ng hloh, kơmâu ‘lơ̆ng hloh ăn kơ rim ŭnh hnam lơ̆m năr Tết truh Puih mak vih./.