Hơmet ăn tơdrong ‘meh vă răt yua lơ̆m khei năr Têt ăn kon pơlei, Công ty Cổ phần Bánh mứt kẹo Hà Nội (Hanobaco) hlôi hơmet ăn tơmam drăm têt sơnăm 2025 đơ̆ng tŏk bŏk sơnăm sơ̆. Kiơ̆ kơ ‘noh tơmam drăm mứt tết, ƀĕng keo Têt ... tŏk lơ 10%, hăm vă jê̆ 350 tân mứt, 100 tân ƀĕng keo. Yak hơdoi hăm kon pơlei răt yoa, hơnih tơlĕch lơ tơmam drăm tĕch mơdro răt yua năr Têt hăm tơmam drăm ‘lơ̆ng păng kơjă păh ai. Ƀok Lê Ngọc Huy, Kơdră hơnih vei lăng mơdro sa găh, Công ty Cổ phần Bánh mứt kẹo Hà Nội tơbăt, lơm khei ‘năr pơm tơlĕch, kŏng ty hơnơ̆ng pơm kiơ̆ kơjăp rim tơdrong tơchơ̆t pơkăp rơgoh ‘lơ̆ng tơmam drăm vă chă tĕch mơdro tơmam drăm ‘lơ̆ng liĕm hloh ăn kon pơlei. Atŭm hăm ‘noh, tơmam drăm tĕch mơdro iŏk yua năr Têt đei hơnih lăng kơjăp pơm tơlech đei tơmam drăm ƀăt ‘lơ̆ng kiơ̆ hơlŏng rim tơring:“Nhôn pơm tơlĕch dôm tơmam drăm kiơ̆ chăl hle dăh mă pơm kiơ̆ tơdrong mơ̆t lĕch kơ pêng tơring. ‘Noh dôm kơ hôp mư̆t mă nhôn pơm tơlĕch rim tơmam drăm ‘moi kiơ̆ 3 tơring Tu-Tŏk bŏk-Pơbăh rim kơ loăi mư̆t đei 12 tơmam ƀou phu blơch ou to; ‘ngoăih dôm tơmam ngăl yoa nhen: ƀum krĕm, rơya, ka rôt  ... ‘noh đei hloi tơmam ƀou phu blơch iŭ ‘ngam kơ plei pơmur, ƀou phu plei măng kâu, mit, sâu riêng… hơpơi ‘meh vă hơnhăk đei tơdrong ‘lơ̆ng hơ iă ăn rim bơngai răt yoa, adoi nhen tơdrong ‘lơ̆ng liĕm kơ tơmam drăm vă bơngai răt yua chă rơih đei tơmam drăm sa kiơ̆ hơlŏng kơdih”.

Khei năr ou, lơ hơnih mơdro sa găh phe ƀa, tơmam drăm sa jei hlôi hơmet ăn tôm tơmam drăm ăn tĕch răt măh mai lơ̆m khei năr têt kơ kon pơlei. Ƀok Trương Mạnh Linh, Kơdră chĕp pơgơ̆r hơnih jang phe ƀa kơ Grŭp jang Tân Long tơbăt, khei năr ou hlôi đei tôch kơlơ hla bơar pơkăp tĕch răt ba ăn lơ̆m jăl 1/2025. ‘Ngoăih tĕch mơdro tơ̆ teh đak đe, Hơnih mơdro sa hlôi hơmet ăn phe tôch kơ lơ tơgŭm tĕch mơdro lơm khei năr Têt Nguyên đán, hăm phe tĕch mơdro tŏk lơ kiơ̆ sơnăm păng hlôi pơprŏ mong răk ‘lơ̆ng hloh chă tĕch mơdro ăn kon pơlei răt yoa lơ̆m sơng Têh Ất Tỵ 2025:“Nhôn hơmet lơ tơmam drăm vă măh mai ăn tĕch răt lơm teh đak, hăm trong sơ̆k păng mong răk phe ‘lơ̆ng hơ iă, măh măh mai, đei phe ‘lơ̆ng tĕch mơdro lơ̆m teh đak, sơđơ̆ng măh mai lơ̆m khei năr Têt”.

Vă sơđơ̆ng ‘lơ̆ng hơ iă hloh pơyan tĕch răt lơ hloh lơ̆m sơnăm, rim hơnih tĕch mơdro tơmam sa kăl adoi nhen hlôi jang keh đang pơm tơlĕch tơmam drăm. Rim hơnih tĕch mơdro tơmam drăm kăl iung jang răt iŏk tơmam drăm choh jang sa, tơmam drăm gĭt kăl kơ rim dêh char, pơjing đei lơ tơmam drăm (mă kăl tơmam drăm Việt Nam) tơgum tĕch răt lơ̆m khei năr hơtuch sơnăm, hơdrol, lơ̆m păng đơ̆ng rŏng Têt Nguyên đán. Ƀok Trương Sỹ Bá, Kơdră Khul chĕp pơgơ̆r  Công ty cổ phần Nông nghiệp BAF Việt Nam tơbăt, hăm ‘nhĕm nhŭng hơnih mơdro sa hlôi hơmet răk tôch hơlen, chă rong lơ đơ̆ng hrôih vă măh mai ăn tĕch răt kơ kon pơlei lơ̆m jơ ‘năr Têt Nguyên đán 2025:“Têt sơnăm ou, nhôn gô tĕch tơlĕch đei 1 triu 100.000 truh 1 triu 200.000 tŏ nhŭng. Hăm tơdrong atŏk kơtang rong lơ đơ̆ng rim hơnih mơdro sa atŭm hăm rim Công ty rong kon tơrong anai, gô tơgop đei lơ nhŭng tĕch mơdro hloh dơ̆ng ... Đơ̆ng mă noh gô trŏ lăp hăm tơdrong ‘meh răt iŏk đơ̆ng kon pơlei”.

Kiơ̆ đơ̆ng yă Nguyễn Kiều Oanh, Kơ iĕng Kơdră chĕp pơgơ̆r Hơnih vei lăng Mơdro sa Hà Nội, khei năr Têt ou pơlei tơm hlôi hơmet ‘lơ̆ng tơmam drăm tĕch mơdro, adoi nhen dôm tơmam drăm ‘lơ̆ng chă tĕch ăn kon pơlei lơ̆m pơlei tơm-đơ̆ng hơdrol Têt nguyên đán 3 khei. Atŭm hăm ‘noh pơgơ̆r tĕch mơdro tơmam drăm măh mai, kơjă sơđơ̆ng ăn kon pơlei; pơgơ̆r iung jang rim tơdrong tơjur kơjă vă pơtrŭt răt yoa lơ, ưh kơ lê̆ đei ưh kơ măh tơmam drăm pơm ăn kơjă tŏ măt:“Nhôn jei hlôi pơma dơnuh hăm rim hơnih mơdro sa adoi nhen rim ŭnh hnam tĕch mơdro, rim kơchơ vă băt hơdăh tơdrong ‘meh vă răt yoa adoi nhen tơmam drăm chă tĕch mơdro trŏ lăp hăm kon pơlei lơ̆m jơ ‘năr Têt Nguyên đán sơnăm ou. Nhôn gô iung jang ‘lơ̆ng hloh dơ̆ng hơnăp jang kơdih vă hoei đei ưh kơ măh tơmam drăm adoi nhen dôm tơmam drăm tĕch mơdro lơ̆m Hà Nội jei ‘lơ̆ng kơjăp ngăl”.

Vă sơđơ̆ng ăn tơdrong tĕch răt rim tơmam drăm kăl, tơmam drăm pơm sơđơ̆ng kơjă khei năr  Têt Nguyên đán Ất Tỵ sơnăm 2025; Hơnih tơm vei lăng Mơdro sa athei rim hơnih vei lăng mơdro sa rim dêh char, pơlei tơm găh Trung ương dăr lăng kơjăp tơdrong mơdro sa, tơdrong tĕch răt tơmam drăm kăl, tơlĕch iung jang rim trong jang hơ iă dăh mă tơbăt ăn hơnih bơ̆ jang kơpal trong pơm sơđơ̆ng mơdro sa, ưh kơ lê̆ đei tơdrong ưh kơ măh tơmam drăm, pơm đei tŏk kơjă lơ̆m khei năr hơtuch sơnăm păng Têt Nguyên đán.

Atŭm hăm ‘noh, iung jang hơmet, mong răk tơmam drăm kăl tech mơdro ăn khei năr têt, tơlĕch rim trong jang pơm sơđơ̆ng kơjă tĕch mơdro kiơ̆ tơdrong tơchơ̆t kơ Khôi luơ̆t. Adoi, atok kơtang tơlĕch jang rim ‘Măng hơvơn “Bơngai Việt Nam răt yoa tơmam drăm Việt Nam”, Tơdrong jang ba tơmam drăm Việt vih hăm tơring choh jang sa, vih hăm hơnih jang kmăi kmŏk pơm tơlĕch tơmam drăm atŭm hăm pơgơ̆r rim kơchơ, tơjur kơjă, pơtrŭt răt lơ. Atŏk kơtang bơ̆ jang dăr lăng, lăng hơlen hơnih tĕch răt, kơjă tơmam drăm, tơdrong ‘lơ̆ng tơmam drăm, rim tơdrong tơchơ̆t găh sơđơ̆ng rơgoh tơmam drăm sa, rim trong pơm pơdăr gơ̆t tơmam drăm vă tĕch tŏk kơjă ưh kơ trŏ lăp.