Dôm sơnăm âu, tơ̆ hơnih mir să 3 hek tar tơ̆ thôn 10, xăh Hoà Phú, pơlei tơm Buôn Ma Thuột, klo kăn ‘nhŏng Hoàng Văn Hồng kŭm hăm 1,2 ‘nu kŏng nhân tŏk bŏk hơmet đing tơruih păng pơm jrăng tơjră ăn dôm hơ nglŭng prit hrĭl hrăl. ‘Nhŏng roi tơbăt, ŭnh hnam pơtơm tơplih teh pơtăm ‘nhot păng hơƀo lai jing pơtăm prit đơ̆ng blŭng sơnăm 2021. Prit ưh khan lăp hơnhăk ăn iŏk yua ‘lơ̆ng mă kŏng vei lăng kŭm tơ jur lơ.

“Sơnăm ‘nâu tơmoi tŏk bŏk năm truh tơ̆ pơgar lăng păng răt đĭ bơih. Ĭnh tơchĕng rŏ lăng akŏm iŏk đơ̆ng 3 hek tar jô̆ pơhlom dang 1 ti hlak jên, 1 hek tar iŏk đei lơi đơ̆ng dang 200 triệu hlak jên. Hloh kơ ‘noh dơ̆ng, prit lăp kăl kơ 1 sơnăm vă koh tĕch, kơna ưh kơ đei pơ ‘ngơ̆m jên nhen dôm ‘long đunh sơnăm nhen tiu dăh mă ƀơ đunh ƀiơ̆.”

‘Nhŏng Đậu Văn Tuấn, tơ̆ thôn 5, xăh Hoà Phú, pơlei tơm Buôn Ma Thuột, pơtơm pơtăm prit đơ̆ng sơnăm 2020. Hăm 5 hek tar hlôi ăn iŏk yua sơđơ̆ng, sư hơmet ăn vă pơih să teh tŏk hloh 2 ‘măng mưh kĭ hla ar pơkăp thuê dơ̆ng teh pơtăm đơ̆ng kon pơlei lơ̆m tơring. ‘Nhŏng Tuấn roi tơbăt:

“Tơ̆ tơring Hoà Phú âu, nhôn găh lơ yua hơdrĕch prit Thái Lan, đei hơnhăk đơ̆ng tơring Ba Vì, dêh char Hà Tây so. Vă prit bluh jing hrĕnh păng iŏk đei plei lơ, nhôn ling lang rơih dôm tơđăh pran, ‘lơ̆ng vă pơtăm. Prit Thái Lan tôch kơ lăp hăm teh, tŏ ‘mi kial kơ Đắk Lắk, kơlih thoi noh prit tơ̆ âu bluh jing tôch kơ ‘lơ̆ng.”

Ƀok Nguyễn Văn Kha, tơ ‘ngla anih mơdro sa răt iŏk prit tơ̆ Đắk Lắk truh đơ̆ng dêh char Hưng Yên, roi tơbăt, rim sơnăm, sư răt iŏk rơbâu tấn prit vă tĕch ăn tơ̆ dêh char găh Tu păng tĕch tơ̆ teh đak đe. Sơnăm ‘nâu, anih mơdro sa hlôi pơkă răt iŏk dang 700 hek tar prit vă tĕch ăn anih tĕch mơdro năr tết Ất Tỵ 2025:

“Mĭnh sơnăm ĭnh tĕch dôm jĭt rơbâu tấn prit tơ̆ anih tĕch mơdro Trung Quốc, tam mă jô̆ kơsô̆ tĕch lơ̆m teh đak kŭm tôch kơ lơ. Prit tơ̆ Đắk Lắk tôch kơ ‘lơ̆ng. Sơnăm ‘nâu, nhôn hlôi kĭ hla ar răt iŏk dôm hrĕng hek tar prit, hăm kơ jă đơ̆ng 200 – 350 rơbâu hlak jên 1 hơ nglŭng.”

Lơ̆m dêh char Đắk Lắk dang ei đei hloh 2.400 hek tar prit, tơmam iŏk đei vă jê̆ 66.000 tấn. Dôm hơdrĕch prit găh lơ đei pơtăm ‘noh jĭ prit bia Nam Mỹ păng prit lao (hơdrĕch Thái Lan), akŏm găh lơ tơ̆ dôm apŭng Buôn Đôn, Ea Kar, Krông Pắk, M’Đrắk păng pơlei tơm Buôn Ma Thuột. Kŭm hăm dôm kơloăi tơmam đơ̆ng choh jang sa nai, prit tŏk bŏk tơƀôh tơdrong ‘lơ̆ng ƀơ̆t pơtăm tơ̆ dôm teh hrâu hăm chuơh păng tơring hrâu đơ̆ng teh gôh hăm teh lơ̆n tơ̆ Đắk Lắk, tơgŭm pơtăm đei lơ kơloăi ‘long pơtăm, păng hơtŏk iŏk yua ăn kon pơlei jang chŭn mir.