Kiơ̆ kơ Anih vei lăng găh Choh jang sa păng Hơtŏk tơiung tơring tơrang dêh char Đắk Lắk, pơyan jang cheh phe sơnăm 2023-2024, akŏm kơsô̆ cheh phe kơ Đắk Lắk đei hloh 535.000 tấn, jur 23.000 tấn pơting hăm pơyan jang sơnăm hơdrol. Mă lei gơnang đơ̆ng kơjă tĕch tơ̆ teh đak đe tŏk măk, jên tĕch tơlĕch cheh phe tơ̆ teh đak đe kơ dêh char đei 915 triệu USD, tŏk 168 triệu USD pơting hăm pơyan jang hơdrol.

Kiơ̆ kơ ƀok Nguyễn Hoài Dương, Kơdră Anih vei lăng găh Choh jang sa păng Hơtŏk tơiung tơring tơrang dêh char Đắk Lắk, ‘long cheh phe oei jing ‘long tơm, tơgop gĭt kăl lơ̆m hơtŏk tơiung mŭk drăm - tơpôl kơ tơring. Mă loi ‘noh jĭ, lơ̆m pơyan jang sơnăm 2023-2024, Đắk Lắk hlôi pơih să, hơtŏk tơiung đei tơmam cheh phe ‘lơ̆ng, ‘nâu jĭ trong hơtŏk tơiung ‘nao, lăp hăm ‘meh vă răt yua lơ̆m apŭng plĕnh teh. Lơ̆m pơyan jang sơnăm vă jê̆ truh kơnh, rim tơring lăng kăl hơtŏk ‘lơ̆ng plei lơ, ‘lơ̆ng, hơtŏk tơiung lơ hloh dơ̆ng dôm tơring pơtăm cheh phe ‘lơ̆ng; tŭn pran vei lăng tơgŭm cheh phe đei Hla ar pơkăp Buôn Ma Thuột lơ̆m dôm anih tĕch mơdro teh đak đe; pơm kiơ̆ pơm tơlĕch cheh phe tơ jră phă bri đơ̆ng jơnŭm châu Âu.