Kiơ̆ tơdrong tơbang gah bri ah sơnăm 2023 kơ dôm dêh char tơring Tây Nguyên; bri tơring Tây Nguyên đei hloh 2,5 triu ha; lơ̆m noh, bri hon kơdih đei jê̆ 2,1 triu ha, đei 81%, bri pơtăm 'noh đei jê̆ 500 rơbâu ha, đei 19%. Tơring Tây Nguyên đei jê̆ 13.000 tơm bri noh unh hnam, bơngai jang, pơlei pơla vei lăng hloh 127.000 ha. Pơgơ̆r tơdrong hop akŏm, Kơdră Anih tơm jang gah vei lăng bri Bùi Chính Nghĩa ăn tơbăt, tơdrong chih pơtĭl bri oei dôm yơ jing trong tơm vă pơm kiơ̆ tơlĕch hơlen bri păng teh bri rim sơnăm păng tơdrong chih pơkăp vei lăng, hơtŏk bri đơ̆ng trung ương truh tơ̆ tơring.

Atŭm hăm noh jing tơdrong tơroi tơbăt ăn tơdrong pơjao bri tơguăt hăm pơjao teh 'long bri păng pơm kiơ̆ tơchơ̆t kla jên vei lăng bri. Tơdrong chih pơtĭl bri oei dôm yơ hlôi đei Jơnŭm pơgơ̆r teh đak pơgơ̆r jang athei keh đang lơ̆m sơnăm 2025, kơyuơ noh dôm tơring gô hơtŏk jang tơnăp hloh lơ̆m tơdrong pơgơ̆r jang chih pơtĭl bri oei dôm yơ.