Anih jang vei lăng kon pơlei dêh char Đăk Lăk hlôi pơtruh nơ̆r hăm Anih Mong jên teh đak Việt Nam pơm jang tơ̆ Đăk Lăk dah hrôih pơgơ̆r dôm anih mong jên jang tĕch pơdro, anih mong jên lơ̆m dêh char pơtoi asong jên tŏk iŏk ăn dôm anih jang, bơngai jang chă răt akŏm păng tĕch kaphê ăn teh đak đe lơ̆m pơyan jang kaphê 2024 – 2025.  Truh dang ei, rim anih mong jên tơ̆ dêh char hlôi asong hloh 8.700 tih hlj, tŏk 10,3% pơtêng hăm pơyan hơdrol ki. Rim anih mong jên lơ̆m tơring pơkăp gô asong jên mong vă asong tŏk iŏk ăn tơdrong pơm jang, tĕch tơlĕch kaphê ăn teh đak đe kơ anih jang mŭk drăm păng kon pơlei.

Pơyan pĕ kaphê sơnăm 2024, kơjă kaphê klong tơ̆ Đăk Lăk noh đơ̆ng 110.000 hlj truh 125.000 hlj 1 kĭ, kơjung hloh 70% truh 80% pơtêng hăm pơyan pĕ yua ah sơnăm sơ̆, noh tơdrong kăl lơ jên jang hloh hăm dôm anih jang răt akŏm, pơm jang păng tĕch tơlĕch ăn teh đak đe.