Kơtă pơjao ăn bơngai tang măt kơ dêh char Lai Châu 2.000 tơm tơđah sâm Ngọc Linh, Ƀĭ thư Tĭnh uy Kon Tum – ƀok Dương Văn Trang hơpơi 'meh dêh char Lai Châu gô vei lăng tơnăp tơm hơdrĕch; atŭm hăm noh hơlen kơjăp tơdrong tŏk giơ̆ng kơ tơm, tơblang hơdah kơsô̆ kơchơ̆t saponin đei lơ̆m sâm Ngọc Linh tơ̆ Lai Châu vă băt hơdah tơdrong vơ̆ giơ̆ng, pơih să hơgăt teh pơtăm đơ̆ng rŏng kơnh.

Đơ̆ng rŏng kơ sơng iŏk, dêh char Lai Châu gô pơjao tôm ăn Jơnŭm jang gah Sâm Lai Châu pơtăm, vei lăng păng hơlen kơjăp tơdrong vơ̆ giơ̆ng kơ tơm sâm. Lơ̆m tơdrong pơtăm hơlen lăng, gô tơrĕk kơjăp hăm dêh char Kon Tum vă băt gah kih thuơ̆t.