Hla ar drơ̆ng ăn vei lăng tơgŭm hơnăn tơpôl "Sầu riêng Krông Búk" đei tơmơ̆t yua 10 sơnăm. ‘Nâu jĭ tơdrong ‘lơ̆ng khôi luơ̆t pơm tơdrong hơiă vă apŭng hơnơ̆ng hơtŏk tơiung hơnăn păng hơtŏk ‘lơ̆ng kơjă tơmam sầu riêng kơ tơring. Đắk Lắk hlôi băt hơdăh 7 tơring pơtăm sầu riêng. Krông Búk jĭ apŭng mă 4 pơjing hơnăn sầu riêng tơpôl.

‘Noh kŭm jing tơdrong ‘lơ̆ng ăn trong jang tơ̆ hơnăp kơnh Đắk Lắk gô pơjing hơnăn sầu riêng Đắk Lắk lơ̆m anih tĕch mơdro. ‘Ngoăih kơ Krông Buk, 3 apŭng nai tơ̆ Đắk Lắk iŏk yua hơnăn sầu riêng tơpôl ‘noh Krông Pắch, Cư M’Gar păng Krông Năng. Ƀok Hoàng Kiên Cường, Kơdră Anih vei lăng kon pơlei apŭng Krông Búk, dêh char Đắk Lắk roi tơbăt: Tơdrong drơ̆ng ăn hơnăn gô tơgop ăn tơdrong hơtŏk ‘lơ̆ng hơnăp jang đơ̆ng bơngai pơm tơlĕch pơm lăp hăm ‘meh vă đơ̆ng anih tĕch mơdro.