Tơdrong vă jang trong kơlang mŭk drăm păh Hơlĕch pơlei tơm Pleiku hơtăih kơjung 15km, kon jên tơmơ̆t jang 1.300 ti hlak jên, tơgŭm ăn yak kloh klĕch năm tơ̆ rim apŭng Đak Đoa, Chư Păh, găn hloh rim hơnih tơmang pơhiơ̆ ‘lơ̆ng liĕm hloh lơ̆m dêh char. Krao hơnăn “kơlang mŭk drăm” tơƀôh ăn Gia Lai tôch hơmŏ lơ̆m tơdrong vă jang ou, mă lei dang ei tơdrong vă jang ou tŏk bŏk jing hơnih kăl hloh lơ̆m tơdrong ming man hiơ hiơ̆.

Mă đơ̆ng iung jang ming man lơ̆m vă đĭ sơnăm 2022, đei hơmŏ jăl trong ou gơ̆h ăn rok lơ̆m tŏk bok sơnăm 2025, mă lei dĭng truh dang ei tơdrong jang ming man ‘nao lăp keh đang 46%, tơlech kon jên jang đei vă jê̆ 740 ti hlak jên. Kiơ̆ kơ ƀok Phạm Xuân Điệp - Kơdră Hơnih chĕp pơgơ̆r vei lăng tơdrong vă jang tơmơ̆t jên jang tơ iung pơjing ming man dêh char Gia Lai, hơnih tŏk bŏk hơdrin vă hơmet pơ ‘lơ̆ng tơdrong ou:“ ‘Moi kiơ̆ trong pơrô̆ jang đơ̆ng Khul Kơdră Teh đak păng Hơnih vei lăng kon pơlei, kiơ̆ trong pơprŏ jang sơnăm ou ‘noh tơlĕch kon jên jang tŏ sĕt hloh jơnei 95%. ‘Moi kiơ̆ trong tơlĕch jang ou, Hơnih vei lăng jei hlôi pơrô̆ hơdăh hăm rim tơdrong jang, mă kăl hăm rim hơnih ming man kăl vă sơđơ̆ng jang keh đang trong tơlĕch jang tơlĕch kon jên jang lơ̆m sơnăm. Dôm tơdrong tơnap tap, tơhlăk tơhlĭn tơ̆ hơnih ming man jei hlôi hơmet pơ ‘lơ̆ng bơih.”

Tơ̆ apŭng Chư Păh, tơdrong tơlĕch kon jên jang teh đak roi hiơ hiơ̆. Lơ̆m akŏp 117 ti hlak jên kơ sơnăm 2025, apŭng ‘nao tơlĕch hloh 3 ti hlak jên, lăp jơnei 2% trong tơlĕch jang. Rim tơdrong vă jang tơ iung pơjing ming man tơm tơ̆ Chư Păh, găh lơ iŏk jang dơ̆ng đơ̆ng sơnăm so; rim tơdrong vă jang hle oei tŏk bŏk gô pơm hla bơar. Ƀok Đặng Thái Huy - Kơdră chĕp pơgơ̆r Hơnih vei lăng tơơ̆t jên jang tơ iung pơjing ming man apŭng Chư Păh (Gia Lai) tơbăt, mĭnh păh tơnap tap kơ yuơ đei ƀơm truh bơ̆ jang hơgrop jing mĭnh rim hơnih bơ̆ jang tơ̆ apŭng:“Jei kơ yuơ ou ki tơdrong hơgrop jing mĭnh kiơ̆ hla bơar pơrô̆ jang đơ̆ng dêh char ‘noh pơdơ̆h ‘mơ̆i iung jang minh ƀar hơnih jang păng đei ƀơm truh tơ̆ tơring ‘noh Hơnih jang vei lăng jei tơlĕch kon jên jang hiơ hiơ̆. Vă jê̆ truh khei 5, khei 6 ou hơnih jang vei lăng gô sơkơ̆t hơdăh jang keh đang kơ rim hơnih tơmơ̆t jên jang vă atŏk jang keh đang lơ păng tơlĕch kon jên jang apŭng tŏk lơ.”

Dêh char Gia Lai đei pơjao kon jên tơmơ̆t jang atŏk tơ iung hloh 4.500 ti hlak jên, pơ đĭ kon jên jang sơnăm 2025 păng kon jên jang pơtruh ăn đơ̆ng sơnăm 2024. Lơ̆m ou, kon jên jang tơring hloh 2.600 ti hlak jên, pă dôm yơ ‘noh kon jên jang Trung ương vă jê̆ 1.900 ti hlak jên. Mălei, truh dang ei oei pă 12 apŭng, thĭ xah tim mă klăh asong pơđĭ kon jên jang teh đak tơmơ̆t jang đei pơjao, pơm ăn tơlĕch kon jên jang lăp jơnei hloh 10%, mĭnh kơsô̆ tŏ sĕt hloh pơtêng hăm trong tơlech ăn.

Tơ̆ hơnăp tơdrong ou, dêh char Gia Lai tŏk bŏk tơlĕch jang hrơ̆p mĭnh ‘măng lơ tơdrong jang kơtang. Lơ̆m ou pơjing 4 khul bơ̆ jang kăl kơ yuơ Kơ iĕng Kơdră chĕp pơgơ̆r hơnih vei lăng kon pơlei dêh char iŏk vei lăng. Dôm khul ou akŏm pơrô̆ athei jang keh đang pơ ‘ngoăih hơgăt teh, hơmet ming tơdrong tơchơ̆t hrŭ ăn păng hơmet pơ ‘lơ̆ng kon jên jang. Hăm tơlĕch jang kơtang păng vang iung jang hrơ̆p mĭnh ‘măng đơ̆ng dêh char truh tơring, Gia Lai tŏk bŏk hơmet pơ ‘lơ̆ng rim tơdrong tơhlăk tơhlĭn lơ̆m tơlĕch kon jên jang teh đak Ral Lan Chung - Kơdră chĕp pơgơ̆r Hơnih vei lăng kon pơlei dêh char Gia Lai-pơma hơdăh:“Trung ương tŏk bŏk đei trong pơchoh ăn tơlĕch jang jơnei rim tơdrong vă jang tơmơ̆t jên jang teh đak. Dêh char hlôi tơ iung pơjing trong jang păng trong pơprŏ tơlĕch jang tơdrong ou. Dăr lăng hơlen păng hơvơn rim khul iung jang kơtang hơmet pơ ‘lơ̆ng tơdrong tơhlăk tơhlĭn. Pơm lơ liơ đĭ đăng dôm tơdrong đei rơvơn kơ tơring đei iung jang kơtang hloh vă hơvơn rim khul vang iung jang hơdoi hăm kơdră tơring vă jang kiơ̆ rim trong tơlĕch jang găh atŏk tơ iung mŭk drăm, ‘nou jĭ mĭnh lơ̆m dôm tơdrong jang kăl hloh”.