Sơnăm 2024, Việt Nam tĕch mơdro chehphe tơ̆ teh đak đe hloh 1 triu 320.000 tân hăm iŏk đei vă jê̆ 5 ti 500 triu dolar. Mă đơ̆ng đei lơ, hơnih jang chehphe Việt Nam tơjră muh măt hăm lơ tơdrong long lơ̆m atŏk tơ iung kơjăp ‘lơ̆ng, mă kăl lơ̆m vei lăng rơ̆m rĕk păng iŏk yua tơmam pơ yoa ăn choh jang sa. Vă atŏk kơtang tơdrong jang chehphe atŏk tơ iung kơjăp, khei 6/2024, tơdrong vă jang “Tơ iung pơjing pơma dơnuh trong bơ̆ jang, pơm hơtŏk kĕ jang păng hlôh vao găh iŏk yua tơmam drăm pơ yoa ăn choh jang sa ‘lơ̆ng hơ iă, dônh akŏm păng hơmet pơ ‘lơ̆ng kơchơ̆t iă lơ̆m pơm tơlĕch chehphe tơ̆ Việt Nam” hlôi đei pơgơ̆r. hăm tơdrong tơm pơm ăn jang sa iŏk đei vă jê̆ hơtŏ dih băl ăn dang 150.000 ŭnh hnam jang chehpohe tơ̆ Việt Nam lơ̆m sơnăm 2030, rim kơdră tang măt hlôi pơma dơnuh găh dôm trong ƀôh hơdăh găh tơdrong vă jang ou; tơbăt dih băl rim trong jang, trong choh jang chehphe kơjăp ‘lơ̆ng, jơnei; rim trong iok yua tơmam pơ yoa ăn choh jang sa ‘lơ̆ng hơ iă, dônh akŏm păng hơmet pơ ‘lơ̆ng tơmam rơ̆m rek ... adoi, tơlĕch trong jang păng pơjing tơgoăt dih băl rim pang ƀơm truh lơ̆m atŏk tơ iung chehphe kơjăp ‘lơ̆ng tơ̆ Việt Nam.