'Nou jĭ tơchơ̆t đei Jơnŭm jang gah hơp tak xah dêh char Đăk Lăk tơlĕch ah Lêh pơtơm tơdrong pơlong jang sơnăm 2025. Tơ̆ Lêh pơtơm, Jơnŭm jang gah hơp tak xah dêh char Đăk Lăk hơvơn rim hơp tak xah pơtoi kơchăng, hơtŏk pran iŏk jang kiơ̆ khua hŏk ki thuơ̆t, tơplih kơmăi sô̆, păng tơguăt hăm tơdrong pơm jang đei yua lơ. Kiơ̆ đơ̆ng noh, hơtŏk anih jang hơp tak xah pơm jang sơđơ̆ng, đei cheh đơ̆ng 80% tŏk tơ̆ kơpal; anih jang hơp tak xah jang hơgei đei hloh 55%, hơp tak xah jang tơjruh tơjur oei pă hơla 10%.

Lơ̆m sơnăm ou, pơjing đei tŏ sĕt jat noh 5 hơp tak xah jang kiơ̆ trong 'nao, tơguăt pơm tơlĕch tơmam drăm đei kơjă măt. Ƀok Huỳnh Bài, Kơdră Jơnŭm jang gah hơp tak xah dêh char Đăk Lăk ăn tơbăt, jơnŭm jang gô đei trong chă tơgŭm trŏ ƀlep vă rim hơp tak xah pơm jang đei jơnei nhen tơchơ̆t tơlĕch.