Tơdrong tơplih ‘long pơtăm, yŏng kon tơrong jĭ tơdrong kăl hloh lơ̆m atŏk tơ iung choh jang sa. ‘Nou mĭnh lơ̆m dôm trong jang tơgŭm ăn kon pơlei pơjing đei trong jang iŏk yua kơjăp. Vă jê̆ 2 sơnăm kơ ou, trong jang rong joei bronh iŏk rơnôp tŏk bŏk lang să tơ̆ apŭng groi kông Nam Giang, dêh char Quảng Nam.  

Sơnăm sơ̆, mŏ La Thị Sâm atŭm hăm 5 ŭnh nam oei tơ̆ pơlei Mực, thĭ trân Thạnh Mỹ, apŭng Nam Giang, dêh char Quảng Nam đei tơgŭm ăn 20 tŏ joei bronh kiơ̆ trong jang khul ŭnh hnam pơjao dih băl vei lăng năng tông. Hloh 6 khei, joei hlôi hơnhăk ăn iŏk đei rơnôp. Mŏ La Thị Sâm tơbăt, lơ̆m 1 sơnăm kăt iŏk đei 2 ‘măng rơnôp joei, kơjă chă tĕch 10 triu hlak jên. Rong joei bronh ƀônh hloh pơtêng hăm kon tơrong anai. Adoi chă hiĕm hăm hla ‘long bri păng prit kơsĕ. Truh năr joei chăt rơnôp ‘noh chă hiĕm dơ̆ng bơ̆n pŭk hơƀo, ƀum vă rơnôp hăp ‘lơ̆ng. Đơ̆ng ŭnh hnam dơnuh, tơnap tap, truh dang ei tơdrong hơrih sa kơ ŭnh hnam mŏ La Thị Sâm hlôi sơđơ̆ng.“Gơnơm khul kơdră tơring lăng ba tơgŭm djru, ƀơk ăn yŏng kon tơrong, pơjing rơvơn vă tơdrong hơrih sa kơ kon pơlei lơ̆m khul rong joei bronh sơđơ̆ng hloh kơ sơ̆. Sơ̆ ŭnh hnam jang mir ƀa, chă jang ăn kơ đe kơna tơnap tap dêh. Nhôn ƀôh rong joei đei iŏk yua kơjăp hloh hăm jang sa anai. Ba lăp chă rong, găh tơdrong tĕch răt rơnôp ‘noh păh hơnih tơgŭm ăn yŏng răt iŏk pơ đĭ kơna ưh kơ tơtăm yă kiơ ôh. Tơdăh ba rong ‘me ‘lơ̆ng tơnăp lei đei rơnôp ‘lơ̆ng”.

Tơroi găh rong joei bronh tơ̆ tơring, ƀok Ploong AÊ, oei tơ̆ tơring Tà Bhing, apŭng Nam Giang tơbăt, ‘nou jĭ trong jang ‘nao. Mă đơ̆ng joei bronh ‘noh sem bri brăh mă lei hlôi đei pơƀeh, tôch trŏ lăp hăm groi teh, tŏ ‘mi kial, tơring kông; kon pơlei jei gơ̆h chă iŏk bơ̆n hơnong ƀa hla hơƀo chă hiĕm, pơm dă ƀiơ̆ tơhoach kon jên răt tơmam drăm hiem. Ƀok Ploong AÊ tơbăt dơ̆ng: rong joei bronh tôch hiôk, hoei đei jĭ jăn, hơnhăk đei iŏk yua lơ hloh ƀar ‘măng pơtêng hăm rong nhŭng, iĕr, rơmo.“Găh iŏk đei dang 2 truh 3 khei ‘noh joei hlôi đei rơnôp bơih, kon pơlei chơt hiôk dêh kơ yuơ tĕch măt.Khul nhôn đei 5 ŭnh hnam chă rong 20 tŏ, lơ̆m ou đei 15 tŏ joei bŏng hlôi đei rơnôp ngăl bơih, lơ̆m mĭnh ‘măng kăt tĕch đei dang 100 triu hlak jên”

Tơ̆ apŭng Nam Giang, dêh char Quảng Nam dang ei đei 200 ŭnh hnam kon pơlei bơngai Cơ Tu vang rong joei bronh iŏk rơnôp, akŏm tơ̆ rim tơring Tà Pơ, Cà Dy, Tà Bhing păng thĭ trân Thạnh Mỹ. Kiơ̆ đơ̆ng ƀok Ông A Rất Bhen, Kơ iĕng Kơdră chĕp pơgơ̆r Hơnih vei lăng Choh jang sa păng Cham char apŭng Nam Giang, dêh char Quảng Nam, rong joei iŏk rơnôp hơnhăk đei iŏk yua kơjăp hloh pơtêng hăm kon tơrong anai. Đơ̆ng rim Tơdrong jang tơm teh đak atok tơ iung mŭk drăm, tơpôl tơring kon kông ... mĭnh sơnăm, apŭng Nam Giang hlôi hơmet ăn 100 triu hlak jên, klăh asong ăn rim tơring tơgŭm ăn kon pơlei jang sa, rong kon tơrong ... Ƀok A Rất Bhen, tơbăt:“Jang pơlong năng rong joei bronh, ‘măng blŭng hơnhăk đei iŏk yoa kơjăp. Lơ ŭnh hnam păng khul ŭnh hnam rong hlôi kăt ronôp tĕch bơih hơnhăk đei iŏk yua kơjăp. Khei năr kơnh, apŭng Nam Giang hơnơ̆ng chă tơchĕng vă hơlen dơ̆ng trong jang ou păng lang să. Lơ ŭnh hnam rong joei đơ̆ng ŭnh hnam dơnuh păng vă jê̆ dơnuh hlôi yak hloh dơnuh păng jang sa iŏk yua kơjăp. Hơnih vei lăng Choh jang sa păng Cham char hơnơ̆ng pơchoh trong hăm kơdră apŭng tơlĕch trong jang rong joei, tơgoăt jang hơdoi hăm rim hơnih păng răt iŏk tơmam drăm kơ kon pơlei”

 Dôm sơnăm ou, lơ kon pơlei bơngai Cơ Tu tơring groi kông dêh char Quảng Nam hơbĕch hơbal, nơ̆r pơma tơ-‘ngla iung jang hloi, hơdrin hŏk pơhrăm, jang pơlong năng tơplih ‘long pơtăm, kon tơrong hơnhăk đei iŏk yua kơjăp. Atŭm hăm kon jên jang đơ̆ng Trung ương, dêh char Quảng Nam hlôi tơgŭm kon kông, kon pơlei tơring atăih yăih găh tơdrong jang sa, ‘long pơtăm, kon tơrong vă atŏk tơ iung mŭk drăm. Khul kon pơlei choh jang sa dêh char Quảng Nam tơgŭm djru kon pơlei atŏk tơ iung rong nhŭng hmă, rơmo yŏng, atŭm hăm trong jang sa hle ... gơnơm kơ ‘noh, tơdrong hơrih sa kơ kon pơlei đei tơplih hơdăh, lơ ŭnh hnam hlôi yak hloh dơnuh kơjăp ‘lơ̆ng. Ƀok Nguyễn Út, Kơ iĕng Kơdră chĕp pơgơ̆r Khul kon pơlei choh jang sa dêh char Quảng Nam tơbăt:“Hăm rim apŭng groi kông nhen Nam Giang, Đông Giang, Phước Sơn kon pơlei iŏk yua kon jên tŏk iŏk đơ̆ng rim hơnih mong jên adoi nhen đơ̆ng Khul kon pơlei choh jang sa tơmơ̆t jên jang atŏk tơ iung mĭnh ƀar trong jang hơnhăk đei iŏk yua kơjăp. Mă hơdăh ‘noh trong rong nhŭng hmă, rong iĕr hơchăng, rong joei ... ‘Nou jĭ dôm trong jang hơnhăk đei iŏk yoa kơjăp ăn kon pơlei, hơmet pơ ‘lơ̆ng hơrih sa păng atŏk tơ iung muk drăm. Dôm trong jang ou ưh khan lăp yak hloh dơnuh mă oei lơ bơngai lơ̆m khul ŭnh hnam pơdrŏng păng hlôi tơgop ăn dêh char Quảng Nam lơ tơmam drăm OCOP, mă kăl hăm rim apŭng groi kông jang sa iŏk yua kơjăp. Kiơ̆ đơ̆ng noh pơjing tơdrong joăt ăn kon pơlei akŏm jang sa pơjing đei tơmam drăm rơgoh ‘lơ̆ng, sơđơ̆ng”.