Tơdrong huch cheh phe ‘lơ̆ng lang să, tŏk bŏk pơm ăn anih tĕch mơdro ƀĕnh tơdrong ‘lơ̆ng hăm kơjă cheh phe tŏk măk. Lăng ƀôh tơdrong hiôk âu, lơ anih mơdro sa tơ̆ Gia Lai hlôi iung jang tơmơ̆t jên jang ‘lơ̆ng, lăng truh tơdrong pơm tơlĕch hrĕp đơ̆ng hơdrĕch ‘long, pơtăm truh pơm tơlĕch jrŭ.

Ƀok Nguyễn Tiến Định - Kơdră vei lăng Kŏng ti Cheh phe Việt Nam United, apŭng Chư Prông, Gia Lai roi tơbăt: “Nhôn lăng ƀôh cheh phe ‘lơ̆ng ‘noh jĭ trong jang đơ̆ng anih jang cheh phe jơ̆p plei teh yua thoi noh nhôn gô ưh kơ dơ̆ng tơ̆ ‘ngoăih. Lơ̆m kơpăh bơ̆jang hăm ŭnh hnam kon pơlei jang chŭn mir nhôn kŭm kơchăng vang tơgŭm pơtho tơdrong hlôh vao hăm kon pơlei jang chŭn mir vă đe sư ‘meh tĕch đei cheh phe măk ƀiơ̆ ‘noh athei hơtŏk ‘lơ̆ng cheh phe vă đei iŏk yua ‘lơ̆ng hloh.”

Ưh khan lăp jing tơdrong tơroi đơ̆ng anih mơdro sa, cheh phe ‘lơ̆ng kŭm pơm đei dôm tơdrong tơplih lơ̆m trong pơm tơlĕch đơ̆ng kon pơlei jang chŭn mir păng dôm hơp tak xăh. Đơ̆ng lăng kăl tơmam  ‘lơ̆ng truh pơm tơlĕch kơjăp, kon pơlei hlôi iŏk yua trong jang rơgoh, phĕ iŏk rơih, ôp plei păng sơ̆k tơ̆ kơ drơng.

Tơ̆ apŭng Đăk Đoa, Hơp tak xăh Choh jang sa păng Pơvih pơvăn Lam Anh hlôi jơnei hăm tơdrong jang pơtăm tuh mơ̆r. Tơmam cheh phe kơ hơp tak xăh ưh khan lăp iŏk đei hla ar pơkăp OCOP 4 hơngŏng kơ dêh char, mă oei pơm lăp đon đei lơ anih mơdro tôch kơ hơlen lơ̆m păng ‘ngoăih teh đak.

Ƀok Lê Hữu Anh - Kơdră vei lăng Hơp tak xăh tơroi:“Hăm um rup kon pơlei jang chŭn mir tơpăt, đei đon lui tih lơ̆m kơjă kăp gĭt đơ̆ng găr cheh phe, nhôn hlôi tơplih trong vei lăng pơgar cheh phe, hơtŏk ‘lơ̆ng tơmam. Tơdrong ‘nâu ưh khan lăp tơgŭm hơtŏk kơjă cheh phe đĕch mă oei tơgop sut pơngot tơ jur dơnuh hin, tơgŭm kon pơlei pơm pơdrŏng đơ̆ng ‘long cheh phe.”

Dang ei, Gia Lai hlôi pơjing 34 tơdrong jang hơdai pơm tơlĕch tơklep hăm tĕch cheh phe, hăm akŏm teh să hloh 43.500 hek tar; akŏm đei 26 anih mơdro sa păng 8 hơp tak xăh. Lơ anih mơdro sa hlôi pơ̆n pơm tơlĕch cheh phe rơgoh, tơmơ̆t jên jang pơm tơlĕch jrŭ vă hơtŏk ‘lơ̆ng păng hơtŏk kơjă tơmam. Vă cheh phe ‘lơ̆ng păng cheh phe ‘lơ̆ng hơdrô̆ yak lĕch đơ̆ng dôm tơdrong jang, khŭl kơdră rim tơring lơ̆m dêh char tŏk bŏk tơlĕch jang lơ trong jang tơgŭm ‘lơ̆ng, đơ̆ng tơdrong chĕng hơmet teh tơring pơtăm truh tơklep hơdai anih mơdro sa hăm anih tĕch mơdro apŭng plĕnh teh.

Ƀok Đoàn Ngọc Có – Phŏ Kơdră Anih vei lăng găh Choh jang sa păng Cham char dêh char Gia Lai roi tơbăt:“Truh sơnăm 2030, ‘ngoăih tơdrong hơtŏk tơiung cheh phe ‘lơ̆ng 2.340hek tar Gia Lai gô hơnhăk 80% hơgăt cheh phe kơ dêh char đei pơm tơlĕch kiơ̆ hơgăt ‘lơ̆ng hla ar pơkăp. ‘Ngoăih kơ tơdrong bơ̆n hơtŏk tơiung cheh phe ‘lơ̆ng păng cheh phe kiơ̆ hơgăt vă pơm lăp hăm anih tĕch mơdro, Gia Lai kŭm tŏk bŏk hơdrin sơng đei tơmơ̆t jên jang vă gơh pơjing anih jang, dôm hnam kơmăy pơm tơlĕch jrŭ tơmam cheh phe vă hơtŏk kơsô̆ pơm tơlĕch jrŭ cheh phe lơ̆m dêh char, kŭm nhen hơtŏk kơjă đơ̆ng tơmam cheh phe.”

Hăm dôm tơdrong hơdrin ưh kơ đei pơdơh đơ̆ng anih mơdro sa, kon pơlei jang chŭn mir păng khŭl kơdră tơring, cheh phe Gia Lai tŏk bŏk ƀrư̆ ƀrư̆ tơƀôh hơdăh anih dơ̆ng lơ̆m hla kak cheh phe ‘lơ̆ng apŭng plĕnh teh. Tơdrong tơplih đơ̆ng pơtăm lơ lap jing akŏm lơ̆m tơdrong ‘lơ̆ng kơ jă kơjăp, kŭm hơnhăk ăn iŏk yua lơ hloh ăn kon pơlei pơtăm, hơdai hăm hơtŏk hơnăn ‘lơ̆ng kơ cheh phe Việt Nam.