Kiơ̆ roi tơbăt đơ̆ng kon pơlei tơ̆ pơbăh dơnâu đak mong Tà Cang, ‘nao mơ̆t lơ̆m pơyan tŏ dơnâu đak âu đĭ hrơ̆ yua đơ̆ng ưh kơ đei vei lăng ‘lơ̆ng. Tŏ phang pơđang ưh khan lăp tŏk bŏk pơm ăn kon pơlei thôn 4, xăh Diên Bình, apŭng Đăk Tô, dêh char Kon Tum ưh kơ măh đak tơruih ăn ‘long pơtăm mă oei pơm tơƀôh đei lơ tơdrong ưh kơ ‘lơ̆ng lơ̆m tơdrong jang vei lăng păng chĕng hơmet teh ‘long pơtăm tơ̆ dơnâu mong đak âu.

Mă hơdăh ‘noh, kiơ̆ trong jang pơyua ăn tơruih ăn kơ hloh 30 héc-ta ‘long pơtăm, mă lei dang ei tŏk bŏk đei iŏk pơgoh đak vă pơyua ăn kơ hrĕng hek tar. Đĭ thoi noh, đơ̆ng rŏng dôm jĭt sơnăm đei ƀôh, dơnâu đak âu tam mă đei pơm hơmet ming să ‘mơ̆i. Hơdai hăm ‘noh anih jang vei lăng dơnâu mong đak Tà Cang jĭ Kŏng ti iŏk jang dơnâu mong đak Kon Tum mă lei tơdrong pơm hơmet ming dơnâu mong đak ‘noh hơnăp jang đơ̆ng Anih vei lăng găh choh jang sa păng Cham char dêh char Kon Tum.