“Hơnơ̆ng bơngơ̆t truh, tŭn pran hloh dơ̆ng tơdrong jang tơroi tơbăt, roi tơƀôh cheh phe ‘lơ̆ng Việt Nam truh bơngai răt yua lơ̆m teh đak păng apŭng plĕnh teh”. ‘Nâu jĭ 1 lơ̆m dôm hơnăp jang đei Khŭl jang cheh phe ‘lơ̆ng pơma hơdăh lơ̆m Tơdrong tơchơ̆t Hop akŏm Khŭl jang cheh phe ‘lơ̆ng ‘măng mă 2, jăl jang 2024-2029 pơgơ̆r ‘năr 2-8, tơ̆ pơlei tơm Buôn Ma Thuột, dêh char Đắk Lắk. Khŭl jang cheh phe ‘lơ̆ng ( găh Khŭl jang Cheh phe Buôn Ma Thuột, dêh char Đắk Lắk) đei pơjing sơnăm 2019. Đơ̆ng rŏng 5 sơnăm pơjing păng hơtŏk tơiung, truh dang ei, Khŭl jang hlôi đei hloh 80 ‘nu bơngai vang jang tơ̆ dôm tơring pơm tơlĕch cheh phe tơm lơ̆m teh đak ( ‘noh đei: Đắk Lắk, Đắk Nông, Lâm Đồng, Gia Lai, Kon Tum, Sơn La, Quảng Trị, Nghệ An... ).

Tơ̆ Hop akŏm, dôm bơngai tang măt hlôi tơgop nơ̆r vă pơjing khŭl jang hơtŏk tơiung hloh dơ̆ng lơ̆m jăl jang ‘nao, sơkơ̆t hơdăh hơnơ̆ng hơtŏk ‘lơ̆ng hơnăp jang tơgoăt đơ̆ng dôm bơngai jang lơ̆m khŭl, pơm gơng tơƀưh sơng đei lơ hơnih hơdrĕng, tĕch mơdro, hơnih tĕch tơmam păng dôm anih jang tĕch mơdro vă pơjing dôm trong jang hơdai kơjăp. Hơtŏk ‘lơ̆ng kĕ pơm tơlĕch chĕh phe ‘lơ̆ng, pơhrăm, tơmơ̆t yua dôm jơnei kơmăy kơmŏk ‘nao, pơm tơlĕch cheh phe ‘lơ̆ng tơklep hăm dôm tơdrong hơgăt pơm tơlĕch cheh phe kơjăp.