Bơngai rơka đei 'nhăk dŏng hơmet tơ̆ Hnam pơgang ah 10 jơ kơmăng năr 18/12 hăm tơdrong hơbur pơchah đĭ ti gah 'ngeo, rơka ah măt gah 'ma kơyuơ kơmlăi đôh. Ƀak sih Trần Minh Trực – Kơdră khua hơmet ming Rơka hơbur kơ Hnam pơgang Tơm tơring Tây Nguyên ăn tơbăt, kơyuơ rơka hlăm, đe ƀak sih athei kăt dĭ 3 hơnglogah 'ngeo kơ bơngai hơbur, atŭm hăm noh hơmet anih rơka ah măt.

Jơhngơ̆m jăn bơngai hơ-ioh kơplah âu hlôi sơđơ̆ng, mă lei hli gô đei tơdrong đuh jĭ. Hơdrol kơ noh, Hnam pơgang adoi iŏk hơmet ăn 4 'nu hơ-ioh rơka kơyuơ đôh đơ̆ng kơmlăi pơm kơdih.. Đe ƀak sih tơroi, Têt jĭ truh, đe hơ-ioh ƀônh tơdui đơ̆ng tơdrong pơm kơmlăi đơ̆ng mạng tơpôl, hli hlơt tơpă. Đe mĕ ƀă păng hnam trưng hŏk athei kơchăng păng tơroi tơbăt vă vei sơđơ̆ng ăn đe hơ-ioh.