VOV4.bahnar - Tơ\ apu\ng Đak Ha, dêh char Kon Tum, tơdrong ka tơ\ dơnau đak lôch lơ hlôi đe\i [o#h đơ\ng hlo\h m^nh khe\i kơ au păng an^h bơ\ jang găh tơdrong au kơ tơring hlôi sơkơ\t hơdăh tơdrong tơm pơm ăn. Mă le\i, tru\h dang e\i ka oe\i hơnơ\ng lôch đe\ch pơm ăn hiong răm kơtang hlo\h. Kiơ\ ch^h jo# đe\i [o#, ako\p ka lôch tru\h 20 tân găh lơ tăng pơler, ka chep păng ka trăm ko, pơm hiong răm hlo\h 600 tr^u hlak jên.

Vă tang găn pơrang pơra\m, An^h ve\i lăng Rong kon tơrong păng jang pơgang ve\i lăng kon tơrong dêh char Kon Tum hlôi pơtho tơbăt ăn rim u\nh hnam rong ka io\k yua pơgang pơm hơmet pơ ‘lơ\ng dơnau rong; pơcho\h đak sơ\k hre\ng vă pơlôch pơrang …Ma le\i, kơ yuơ hiơ hiơ\ [o#h pơrang j^, adoi ư\h kơ pơm kiơ\ nơ\r chă pơtho khan đơ\ng an^h bơ\ jang, kơna tơdrong ka lôch lơ đunh khe\i năr tru\h dang e\i oe\i hơnơ\ng đe\ch io\k.

Tơblơ\ nơ\r: Amazưt