1. Lơ trong tơlĕch jang gĭt kăl đơ̆ng jăl jang Hop akŏm XIII kơ Đảng

Tơ̆ hop akŏm ‘măng mă 7, kŭm hăm tơdrong hơlen lăng tôm tơdrong, ‘lơ̆ng dôm jơnei, Anih chĕp kơ̆l pơgơ̆r Trung ương hlôi iŏk đei 5 ƀai hŏk hlôh vao; tơlĕch ăn 5 hơnăp jang tơm lơ̆m 1 puăt hơtuch kơ jăl jang jăl XIII; iŏk kơ phiê̆u lui dôm bơngai jang lơ̆m Anih tơm chĭnh trĭ păng Ban Bí thư. Tơ̆ hop akŏm ‘măng mă 8, Anih chĕp kơ̆l Trung ương hlôi tơlĕch ăn 4 Tơdrong tơchơ̆t gĭt kăl; set hơlen, tơgop nơ̆r proh hơmet Anih chĕp kơ̆l pơgơ̆r Trung ương Đảng jăl jang 2026-2031. Ƀar hop akŏm Trung ương gĭt kăl lơ̆m sơnăm bơ̆jang kiơ̆ Tơdrong tơchơ̆t Hop akŏm XIII sơkơ̆t hơdăh tơdrong chĕp kơ̆l, pơgơ̆r kơjăp, hơgei đơ̆ng Anih chĕp kơ̆l pơgơ̆r Trung ương, Anih tơm chĭnh trĭ, Ban Bí thư păng dôm kơdră đảng, khŭl jang đảng lơ̆m tơdrong tơlĕch jang kiơ̆ Tơdrong tơchơ̆t Hop akŏm XIII kơ Đảng, hơmet pơ ‘lơ̆ng tơtom, đei yua lơ tơdrong ‘nao đei ƀôh lơ̆m yan âu vă đĭ đăng khŭl jang chĭnh trĭ hơdrin jang đang jơnei dôm tơdrong tơm hơtŏk tơiung mă Hop akŏm XIII đơ̆ng Đảng tơlĕch ăn.

2. Tơdrong jang tơbôl tơƀôh hơdăh anih dơ̆ng păng bưng ai đơ̆ng teh đak Việt Nam

Dôm ‘măng năm hơpong tơ̆ teh đak Việt Nam đơ̆ng Tổng Bí thư, Kơdră teh đak Cộng hòa Nhân dân Trung Hoa Tập Cận Bình, Kơdră tơm teh đak Mi Joe Biden păng lơ Kơdră chep kơ̆l dôm teh đak; dôm ‘măng năm hơpong đơ̆ng kơdră chĕp kơl Đảng, teh đak Việt Nam truh tơ̆ lơ teh đak pơjing đei lơ tơdrong ‘lơ̆ng hơiă, tôch gĭt kăl hăm tơdrong jang tơbôl đơ̆ng Việt Nam. Sơnăm 2023, Việt Nam păng Trung Quốc drơ̆ng nơ̆r pơjing “Tơpôl tơgum băl tơ̆ ning mônh kơnh Việt Nam - Trung Quốc”; pơm hơtŏk tơdrong pơvei jing “Jang hơdoi gĭt kăl tôm tơdrong” hăm Mi păng Nhật Bản, hơtŏk tơdrong pơvei jang hơdoi gĭt kăl, tôm tơdrong hăm 30 teh đak, lơ̆m noh đei 5 teh đak jang kơtă lơ̆m Jơnŭm vei lăng sơđơ̆ng Liên hợp quốc. Tơdrong jơnei đơ̆ng bơ̆ jang tơbôl sơnăm 2023 hlôi tơƀôh hơdăh trong jang tơbôl đơ̆ng Hop akŏm mă XIII kơ Đảng, vang pơjing păng vei lăng kơjăp tơdrong rơngei, sơđơ̆ng ‘lơ̆ng vă jang tŏk, pơm hơtŏk anih dơ̆ng păng bưng ai, grih tih đơ̆ng teh đak.

3. Jang pơkeh trong jang vei lăng tơdrong chĕp kơ̆l pơgơ̆r; tŭn pran tang găn sa pơgơ̆m pơjĭp

Sơnăm 2023, Anih tơm Chĭnh trĭ tơlĕch ăn lơ tơdrong hơgăt găh vei lăng tơdrong chĕp kơ̆l pơgơ̆r, tang găn sa pơgơ̆m pơjĭp, ưh kơ ‘lơ̆ng lơ̆m tơdrong jang kang ƀô̆; dăr hơlen, tơkêng yoch, sek phak, tơlĕch hla ar phak, hơlen lăng, dăr lăng, pơm kiơ̆ ki luơ̆t đảng păng tơdrong jang dăr hơlen, hơlen lăng jên hu. Dôm tơdrong hơgăt âu tơgop hơtŏk loi dơ̆ng vei lăng kơjăp tơdrong chĕp kơ̆l pơgơ̆r đơ̆ng kang ƀô̆, đảng viên, mă loi ‘noh jĭ đơ̆ng bơngai chĕp kơ̆l. Kơ sâp hla ar “Khŏm jang, hơdrin iung jang tang găn sa pơgơ̆m pơjĭp, ưh kơ ‘lơ̆ng, tơgop pơjing Đảng păng teh đak bơ̆n roi ‘năr roi rơgoh ‘lơ̆ng, pran kơjăp” đơ̆ng Tổng Bí thư Nguyễn Phú Trọng tơƀôh muh măt, tơgop pơm hơdăh đon tơchĕng lĭ luân đơ̆ng Đảng bơ̆n găh tơdrong jang tang găn sa pơgơ̆m pơjĭp, ưh kơ ‘lơ̆ng păng pơjing, hơmet ming Đảng. Tơdrong hơnơ̆ng dăr hơlen pơih să jăl jang 2 tơdrong glăi ƀơm truh Kŏng ti Việt Á, tơdrong glăi đei ƀôh tơ̆ Anih jang tang măt (Anih tơm jang tơbôl); dôm tơdrong glăi đei ƀôh tơ̆ Grŭp jang FLC, Tân Hoàng Minh, Cham char bri brăh Kŏng ti AIC; tơdrong glăi đei ƀôh tơ̆ Anih mong jên SCB, Grŭp jang Vạn Thịnh Phát, Kŏng ti An Đông… sek phak lơ bơngai pơm glăi ‘noh kang ƀô̆ kơdră kơpal, pơđĭ hloi oei jang păng pơdơh hưu kiơ̆ tơdrong “ưh kơ đei tơring kơ̆m, ưh kơ đei ‘ngoăi, mă đơ̆ng ‘noh bu hê̆” tơgop hơmet ming đon lui đơ̆ng kang ƀô̆, đảng viên păng kon pơlei hăm Đảng, teh đak.

4. Mŭk drăm Việt Nam jang tŏk sơđơ̆ng ‘lơ̆ng lơ̆m mĭnh apŭng plenh teh ưh đei sơđơ̆ng

Sơnăm 2023, dôm tơdrong jang tih găh mŭk drăm hlôi jang đei, mŭk drăm lơ̆m teh đak sơđơ̆ng ‘lơng, tơdra adrol GDP tŏk hlŏh 5%, dôm tơdrong kăl nai đei vei lăng ‘lơ̆ng. Lơ tơdrong tơgŭm găh jên hu tih hloh đơ̆ng sơ̆ truh dang ei đei tơlĕch jang hrơ̆ch ‘lơ̆ng, pran kơtang vă tơgŭm jang tơiung ming păng jang tŏk mŭk drăm, tơpôl; hơmet pơ ‘lơ̆ng dôm trong jang, tơdrong tơgŭm vă pơm pơ ‘lơ̆ng anih tơmât jên jang, tĕch mơdro, vei sơđơ̆ng kơjă tơmam yoa kăl păng hơmet pơ ‘lơ̆ng tơdrong pơmat tat tơ̆ anih jang găh jên hu, teh, ming man, tĕch mơdro teh, hnam oei. Mă đơ̆ng ưh đei jang tŏk mŭk drăm nhen thoi kơsô̆ tơlĕch, mă lei ‘nâu jĭ tơdrong adrin tih ƀât mă mŭk drăm Việt Nam pŭ lơ tơdrong ưh kơ ‘lơ̆ng đơ̆ng “kial tơhlu hơdrơ̆k”.

5. Tơdrong hơiă lơ̆m ming man trong nơnăm - pơm tơdrong ‘lơ̆ng ăn hơtŏk tơiung

Sơnăm 2023, Việt Nam hlôi hơdrin hơmet pơ ‘lơ̆ng mơmat tat găh trong jang tơgŭm, pơm đei tơdrong hơiă găh dôm tơdrong jang anih kăl nhen tơlĕch jang tơdrong jang pơm hnam gô gre dơ̆ng păng trong păr jur cham gre păr Long Thành; jang đang 730km trong gre kơdâu hrĕnh, hơtŏk akŏp kơjung trong gre kơdâu hrĕnh lơ̆m teh đak dang ei tŏk vă jê̆ 1.900km; dang ei tŏk bŏk bơ̆jang pơm vă jê̆ 1.700km trong kơdâu hrĕnh tơƀưh Tu Pơbăh, Hơlĕch Pơmơ̆t. Kŭm hăm ‘noh jĭ lơ tơdrong jang pơm trong nơnăm nai hăm akŏp jên tơmơ̆t jên jang teh đak hloh 94.000 ti hlak jên, tơgop hơmet pơ ‘lơ̆ng dôm hơnih hrăt hrot trong nơnăm, ƀrư̆ ƀrư̆ jang đang tơƀưh tơring, pơm tơdrong ‘lơ̆ng vă hơtŏk tơiung mŭk drăm. Hăm tơdrong pơgơ̆r jang kơtang đơ̆ng Khŭl kơdră teh đak, dôm Anih tơm, anih jang, dôm tơring hlôi đei tơplih tih lơ̆m đon tơchĕng, đei trong jang pơcheh hơgei, tơjur ƀiơ̆ hla ar bơ̆jang păng tơdrong pơm hơlam, hơtŏk jơhngơ̆m đon jang tơnăp, vei sơđơ̆ng hrĕnh dôm tơdrong jang.

6. 80 sơnăm Tơdrong tơchơ̆t găh jŏh ayŏ kơ dŏ xoang Việt Nam

Tơdrong tơchơ̆t găh jŏh ayŏ kơ dŏ xoang Việt Nam, hăm 3 tơdrong hơgăt gĭt kăl găh jŏh ayŏ kơ dŏ xoang kăch mang Việt Nam: hơdrĕch hơdrung, khoa hŏk kon pơlei, hlŏh 80 sơnăm iŏk đơ̆ng đei tơlĕch, oei hơnơ̆ng vei kơjăp kơjă kăp gĭt đơ̆ng mĭnh hla ar chih gĭt kăl đơ̆ng tơdrong tơchơ̆t, oei ƀĕnh kơjă kăp gĭt găh nơ̆r tơblang păng chăl hle ‘lơ̆ng rŏ, hơnơ̆ng tơƀôh trong ăn tơdrong jang pơjing păng vei lăng teh đak. Dôm tơdrong jang tơbăt 80 sơnăm chih tơlĕch Tơdrong tơchơ̆t găh joh ayŏ kơ dŏ xoang Việt Nam hlôi roi tơƀôh lơ tơdrong tôch gĭt kăl, vă hơnơ̆ng tưk tơiung kơjă kăp gĭt đơ̆ng jơhnơr arih, kơjă kăp gĭt tơ̆ yăn âu đơ̆ng tơdrong Tơchơt, vă tơdrong jŏh ayŏ kơ dŏ xoang găh jing tơdrong ‘lơ̆ng ăn jơhngâm đon, pơjing đei jơhngâm pran vă jang atŏk tơiung teh đak păng vei lăng teh đak nhen thoi tơdrong Tơchơ̆t đơ̆ng Hop akŏm XIII kơ Đảng tơlĕch.

7. Lơ ‘măng ŭnh sa đôh kơtang pơm ăn hiong răm trăp trĭn

Vă jê̆ 2.000 ‘măng ŭnh sa đôh, vă jê̆ 150 ‘nu lôch, pơm ăn hiong răm tơmam kơtang lơ̆m sơnăm 2023, lơ̆m noh tôch kơtang ‘noh jĭ ‘măng ŭnh sa hnam oei hơdai iĕ đei ƀôh ‘năr 12 khei 9 tơ̆ quận Thanh Xuân, pơlei tơm Hà Nội, pơm ăn 56 ‘nu lôch păng 37 ‘nu rơka. Dôm kơsô̆ ƀĕnh tơdrong hli tơrơ tơroi ăn tơdrong kăl kơ roi tơbăt lơ̆m tơdrong jang tang găn ŭnh sa pĭt ŭnh sa, lơ̆m noh đei tơdrong hơchăng pơ hơi lơ̆m vei lăng lê̆ đei ƀôh tơdrong lơ hnam pơm glăi, ưh kơ vei sơđơ̆ng găh tang găn ŭnh sa pĭt ŭnh sa; tơdrong jang dăr hơlen, hơlen lăng tam mă kơtang hơnhăk truh pơm glăi đunh đai; đon băt kơchăng vei sơđơ̆ng, tang găn ŭnh sa pĭt ŭnh sa đơ̆ng kon pơlei tam mă ‘lơ̆ng... athei kăl đei tơplih, hơmet ming mă kơtang.

8. Tơdrong ưh kơmăh pơgang, tơmam pơyoa ăn jang pơgang tam mă đei hơmet kĕh ‘lơ̆ng

Mă đơ̆ng Quốc hội, Khul kơdră teh đak păng Anih tơm vei lăng jang pơgang hlôi tơlĕch lơ hla ar chih vă “hơmet pơ ‘lơ̆ng pơmat tat” ăn anih jang pơgang, mă lei tơdrong ưh kơmăh pơgang, ưh kơmăh tơmam, kơmăy kơmŏk pơyoa ăn jang pơgang tơ̆ dôm hnam pơgang đơ̆ng Trung ương truh tơ̆ tơring oei tam mă sek tơlang tôch ‘mơ̆i. Tơdrong tơm ‘nŏh yoa ƀơm kơnê̆ đơ̆ng jĭ COVID-19, yoa hla ar chih hơgăt luơ̆t oei ưh kơlăp; tơdrong pơgơ̆r rơih bơngai răt, mă loi hăm dôm tơmam kăp gĭt oei tơhlăk tăk, krê hlŏh dơ̆ng ‘nŏh yoa đei đon krê pơngơ̆t, hli đei tơdrong glăi đơ̆ng lơ bơngai, anih jang, tơring tơrang… Găh đunh đai ning mônh kơnh athei đei lơ trong jang mă pran ‘ƀiơ̆ vă sek tơlang tôch tơdrong ‘nâu.

9. Pơkăp hơdăh khei ‘năr bơ̆jang kiơ̆ hơmet ming tơdrong jang tơgŭm jên khei

Tơdrong bơ̆jang kiơ̆ hơmet ming akŏm tơdrong jang tơgŭm jên khei kiơ̆ lơ̆m hơnih bơ̆jang, vei sơđơ̆ng ưh kơ tŏ sĕt hloh jên khei sa dang ei gô đei bơ̆jang kiơ̆ đơ̆ng ‘năr 01/07/2024. Tơdrong tơm hơdrol hloh đơ̆ng tơdrong jang tơgŭm âu ‘noh jĭ vă jên khei athei tơpă jing jên iŏk yua tơm vei sơđơ̆ng tơdrong arih sa bơngai jang păng ŭnh hnam; kla jên khei ƀlep vă tơmơ̆t jên jang ăn hơtŏk tơiung bơngai jang, pơm tơdrong ‘lơ̆ng hơtŏk lơ iŏk yua bơngai jang păng đei yua tơdrong jang, tơgop gĭt kăl bơ̆jang kiơ̆ hrĕnh păng hơtŏ băl lơ̆m tơpôl, vei sơđơ̆ng chĭnh trĭ - tơpôl, pơtrŭt, hơtŏk ‘lơ̆ng jang tŏk păng hơtŏk tơiung kơjăp.

10. Vei sơđơ̆ng dôm môn thi tốt nghiệp Trung học phổ thông đơ̆ng sơnăm 2025

‘Măng thi tốt nghiệp THPT đơ̆ng sơnăm 2025 vă pơgơ̆r hăm 4 môn, đei 2 môn pơgŏ athei thi ‘nŏh Toán hăm Văn păng 2 môn chă rơih kơdih lơ̆m kơsô̆ dôm môn hŏk đei hŏk tơ̆ lăm 12. Trong pơgơ̆r thi âu pơm tơjur ƀiơ̆ tơdrong kơhret jơhngâm păng ‘moi kiơ̆ tơdrong tơplih ‘nao đơ̆ng pơtho pơhrăm phô thŏng, hơlen năng trŏ đon hŏk gơ̆h hơgei, khei ‘năr hŏk pơhrăm đơ̆ng hŏk tro ‘lơ̆ng hlŏh, tơgŭm ăn hŏk tro hơtŏk đei đon rơgei đơ̆ng kơdih lăp hăm trong pơtho tơƀôh tơdrong jang ăn jăl Trung học phổ thông. Đei bơ̆ jang đơ̆ng sơnăm 2025, trong pơgơ̆r âu iŏk đei tơdrong drơ̆ng nơ̆r, lăp đon đơ̆ng lơ hŏk tro, mĕ ƀă hŏk tro păng thây kô.