Drơ̆ng nơ̆r krao hơvơn đơ̆ng Kơdră teh đak bơ̆n ƀok Lương Cường, Kơdră tơm teh đak Cộng hòa Bulgaria Rumen Radev păng hơkăn sư hlôi truh tơ̆ anih tơm Hà Nội, pơtơm blŭng ‘măng năm ngôi tơ̆ Việt Nam đơ̆ng ‘năr 24 truh 28/11/2024. Pơgê (25/11), tơ̆ Anih bơ̆jang Kơdră teh đak, Kơdră teh đak ƀok Lương Cường păng hơkăn sư hlôi pơgơ̆r pơm Lêh sơng Kơdră tơm teh đak Rumen Radev păng hơkăn sư năm ngôi tơ̆ Việt Nam. Đơ̆ng rŏng Lêh sơng, Kơdră teh đak Lương Cường păng Kơdră tơm teh đak Rumen Radev chĕp kơ̆l Khŭl kơdră kơpal 2 teh đak pơgơ̆r pơma đam, hơlen lăng pơtôch jang hơdai đơ̆ng 2 teh đak khei ‘năr âu ki păng tơlĕch dôm trong jang hơdai tơ̆ hơnăp kơnh. Ƀar Kơdră chĕp kơ̆l hlôi pơma dơnuh jrŭ să găh dôm trong vă jang tih, dôm trong jang hơdăh vă hơtŏk loi dơ̆ng jang hơdai păng hơtŏk tơdrong pơvei tơ̆ hơnăp kơnh.

Mă loi ‘noh jĭ hơtŏk loi dơ̆ng tơƀơ̆p pơma dơnuh đơ̆ng kơdră kơpal, hơmet ming tơdrong jang hơdai găh mơdro sa, tơmơ̆t jên jang, pơtrŭt dôm Anih tơm, anih jang, tơring păng anih mơdro sa 2 păh tơlĕch jang đei yua Tơdrong tơchơ̆t Mơdro sa hiôk hian Việt Nam - EU; tŭn pran jang hơdai lơ̆m dôm tơdrong jang choh jang sa, joh ayŏ tơplŏng kơdâu, kơmăy kơmŏk kơtơ̆ng ang, pơm tơlĕch tơmam drăm kăl lơ̆m teh đak, cham cham char. 2 păh pơma hơdăh gô jang hơdai kơjăp, vang tơgŭm tơdrong hlôh vao păng tơgŭm băl tơ̆ dôm hop akŏm lơ pang, tơgop tơgŭm hơmet pơ ‘lơ̆ng dôm long nol jơ̆p plei teh.