Tơ̆ hop akŏm ou, Trung ương akŏm pơma dơnuh lăng hơlen păng sơkơ̆t hơdăh rim tơdrong nhen trong tơlĕch jang kiơ̆ păng hop akŏm pơtôch jang Tơdrong tơchơ̆t 18 kơ Khul kơdră chĕp pơgơ̆r Trung ương Đảng jăl 12 mĭnh ƀar tơdrong hơnơ̆ng tơplih ‘nao hơmet ming khul kơdră chĕp pơgơ̆r tơdrong jang chinh trĭ kơtoei bơ̆ jang iŏk đei jơnei kơtang; găh tơlĕch jang kiơ̆ dơ̆ng tơdrong jang Ŭnh hơyuh hạt nhân Việt Nam păng hơnơ̆ng chă tơchĕng hơlen Tơdrong vă jang ŭnh hơyuh hạt nhân Ninh Thuận, găh lăng hơlen tơbrar đang viên pơm glăi păng xek tơlen mĭnh ƀar ‘nu kơdră ăn pơdơ̆h bơ̆ jang pơm kơdră jang lơ̆m Trung ương Đảng jăl 13 păng tơbăt hơdăh hơnăn kơdră bơ̆ jang mĭnh ƀar kơchư̆k jang hơnih bơ̆ jang Teh đak. Iung pơma pơrô̆ hop akŏm Tổng Bí thư Tô Lâm pơchŏh ăn 2 tơdrong vă Trung ương lăng hơlen pơma dơnuh păng tơchơ̆t, ‘noh găh trong iung jang hop akom pơtôch bơ̆ jang kiơ̆ Tơdrong tơchơ̆t kơsô̆ 18 păng hơnơ̆ng hơmet ming, pơm pơkeh khul kơdră bơ̆ jang kơ Khul bơ̆ jang chinh trĭ kơtoei, bơ̆ jang jơnei kơtang, mă kăl tơ̆ Trung ương. Pơma hơdăh tơdrong kơtoei khul kơdră chĕp pơgơ̆r kơ khul jang chinh trĭ hlôi đei pơma lơ ‘măng lơ̆m lơ jăl jang păng gô tơlĕch jang kiơ̆ kơtang hloh dơ̆ng lơ̆m jang kiơ̆ tơplih ‘nao.