Tơ̆ lêh pơjao tơmam hơpăh, Khŭl hơpăh tơmam hlôi pôk pơ ư 22 hlak rup ‘lơ̆ng hloh đơ̆ng ‘Măng pơlong sơnăm ‘nâu, rơih iŏk 128 hlak rup vă pơgơ̆r Pơdă tơƀôh ăn tơpôl tơ̆ rim tơring kơ teh đak, tơpôl bơngai Việt Nam oei tơ̆ teh đak đe păng bôl buăl apŭng plĕnh teh. Khŭl châm ƀai pơlong hơlen lăng, kŭm hăm tơdrong hơtŏk găh kơ sô̆, tơdrong ‘lơ̆ng dôm rup vang pơlong sơnăm ‘nâu kŭm đei hơtŏk rơđăh.

Pơma tơ̆ lêh pơjao tơmam, Kơdră Anih tơroi tơbăt Trung ương Nguyễn Trọng Nghĩa pôk pơ ư lăng ‘lơ̆ng dôm bơngai pơcheh hlôi hơdrin vang akŏm ‘măng pơlong. Vă hơtŏk ‘lơ̆ng, đei yua roi tơbăt tơdrong kơtơ̆ng ang tơbôl găh tơdrong jang tơring sơlam teh đak khei ‘năr âu ki, Kơdră Anih tơroi tơbăt Trung ương athei, rim anih jang khŭl tơpôl, đơ̆ng Trung ương truh tơring kăl kơ hơnơ̆ng vei kơjăp trong jang ‘lơ̆ng đơ̆ng Đảng păng Teh đak găh tơdrong jang tơring sơlam, pơm tơm hơgăt teh kơ teh đak lơ̆m tơdrong ‘nao - kiơ̆ tơdrong tơchơ̆t Hop akŏm ‘măng mă 13 kơ Đảng.