Tang măt ăn Khul kơdră pơgơ̆r Hop akŏm, Kơdră vei lăng Khul kon pơlei jang chun mir Việt Nam Lương Quốc Đoàn ăn tơbăt, lơ̆m kơsô̆ 119 ‘nu bơngai jang lơ̆m Khul kơdră chĕp kơ̆l Trung ương Khul kon pơlei jang chun mir Việt Nam jăl VIII, Hop akŏm pôk rơih đei 111 ‘nu bơngai, đơ̆ng rŏng kơ ‘nŏh vă pôk rơih dơ̆ng 8 ‘nu bơngai jang ‘nao lơ̆m mĭnh khei ‘năr yơ kơnh dơ̆ng.

Đĭ đăng bơngai tang măt drơ̆ng nơ̆r hăm hơnăn đei rơih păng tăh kơphĭu chă bơngai jang lơ̆m Khul kơdră chĕp kơ̆l Khul kon pơlei jang chŭn mir Việt Nam jăl 8, đơ̆ng 2023-2028. Đơ̆ng rŏng kơ dôm bơngai tang măt tăh hla, Grŭp jô̆ hơlen kơphĭu kơ Hop akŏm pơgơ̆r jô̆ hloi. Hăm jơhngâm đon tơnăp, jang tơpăt ‘lơ̆ng, Grŭp jô̆ kơphĭu hlôi jang đang ‘lơ̆ng hơnăp jang đei pơjao. Kiơ̆ trong jang, năr ‘nâu (27/12) Hop akŏm vă hôp jơ hơtuch. Khul kơdră chĕp kơ̆l Trung ương Khul kon pơlei jang chun mir Việt Nam jăl 8, đơ̆ng 2023 - 2028 vă lĕch dơ̆ng tơbăt tơ̆ hơnăp Hop akŏm.