Đei pơgơ̆r đơ̆ng năr 9 truh năr 14/7, tơ̆ dêh char Thanh Hóa, Tơdrong Pơlong Pơre nơ̆r jơ̆p teh đak jing tơdrong juăt kơ anih jang rapor pơre nơ̆r Việt Nam, đei pơgơ̆r kiơ̆ pơkăp 2 sơnăm minh ‘măng, vă pôk pơ-ư hăm dôm bơngai chih đei tak phâm hơgei kơ dôm bơngai jang ƀăo pơre nơ̆r lơ̆m jơ̆p teh đak. Tơdrong Pơlong Pơre nơ̆r jơ̆p teh đak – Năr akŏm sô̆ kơ dôm bơngai jang ƀăo pơre nơ̆r, oei jing năr hiôk vă dôm bơngai jang ƀăo, bơngai chih akŏm hŏk hơlen hơtŏk tơdrong jang dih băl.

Pơlong Pơre nơ̆r jơ̆p teh đak ‘măng 16 đei 81 anih jang akŏm pơlong đei 63 Anih Rađiô Rapor – Pơdah tivi dêh char, pơlei tơm, dôm anih jang kơ Rađiô nơ̆r Pơma Việt Nam, Anih akŏm Pơre nơ̆r – Pơdah tivi Khul linh Kon pơlei, Anih jang Tơroi tơbăt Kŏng an Kon pơlei, hăm 380 tak phâm. Đơ̆ng rŏng kơ ‘măng châ̆m hơlen mă blŭng đei pơgơ̆r tơ̆ dêh char Tuyên Quang, Jơnŭm châ̆m hơlen hlôi rơih đei 228 tak phâm đơ̆ng 81 anih jang đei mơ̆t lơ̆m ‘măng pơlong mă hơtuch.