Hơdrol kơ mơ̆t lơ̆m sơnăm hŏk ‘nao, vă pơlung, pơtrŭt đe oh hŏk tro bơngai kon kông hơdrin hŏk pơhrăm, apŭng mơmat tat Tu Mơ Rông, dêh char Kon Tum hlôi pơgơ̆r ăn kơ 40 ‘nu hŏk tro bơngai Xơ Đăng đei hŏk hơgei hloh sơnăm hŏk 2023-2024 păng 4 ‘nu thây kô pơtho hơgei năm tơ̆ Hà Nội roi tơbăt ăn kơ ƀok Hồ kŭm nhen vang akŏm tơdrong jang vă kơ băt ƀĕnh tơdrong ‘lơ̆ng hơiă. Lơ̆m tơdrong jang năm 5 năr, đơ̆ng ‘năr 12-16/8/2024 năm tơ̆ Anih tơm Hà Nội hơpong tơ̆ pơsat Ƀok Hồ.

Khŭl đei 40 ‘nu hŏk tro bơngai Xơ Đăng đei hŏk hơgei hloh păng 4 ‘nu thây kô pơtho hơgei kơ apŭng Tu Mơ Rông đei truh năm lăng tơ̆ lơ hơnih gru groa: Hơnih groa Ngã ba Đồng Lộc, dêh char Hà Tĩnh; Hơnih gru groa soi tơbăt kơ Ƀok Hồ tơ̆ Kim Liên- Nam Đàn, dêh char Nghệ An. Tơ̆ Anih tơm Hà Nội Khŭl hŏk tro hŏk hơgei bơngai Xơ Đăng mơ̆t hơpong tơ̆ pơsat ƀok Hồ păng năm lăng Hơnih gru groa Ƀok Hồ tơ̆ Anih bơ̆jang Kơdră teh đak kŭm hăm 1,2 hơnih tơmang lăng ‘lơ̆ng hơiă kơ Anih tơm.