Olympic Tin học châu Á Thái Bình Dương sơnăm 2023 đei pơgơ̆r kiơ̆ trong pơlong trực tuyến hăm 1471 ‘nu hŏk tro găh 36 teh đak vang pơ long (lơ̆m noh đei 3 teh đak ‘noh Canada, Mexico, Brazil đei hơvơn vang pơ long mă lei ưh kơ đei set jơnei); Trung Quốc ‘noh jĭ teh đak iŏk pơgơ̆r. Khŭl pơ long teh đak Việt Nam ‘noh đei 15 ‘nu, pơ long trực tuyến tơ̆ Hnam trưng Đại học Công nghệ, Đại học Quốc gia Hà Nội ‘năr 20/5/2023. Kiơ̆ tơdrong hơgăt đơ̆ng Anih pơgơ̆r Olympic Tin học Châu Á Thái Bình Dương, Việt Nam đei rơih 06 ‘nu hŏk tro đei điêm lơ hloh vang set jơnei.

Kiơ̆ pơtôch đơ̆ng Anih pơgơ̆r, pơ đĭ 6 ‘nu hŏk tro vang set jơnei kơ Việt Nam iŏk đei mê đai ngăl, ‘noh đei 4 Mê đai hu păng 2 Mê đai kong. Kiơ̆ trong pơ rĕng mê đai, Việt Nam dơ̆ng mă 9. Hăm iŏk yua âu hlôi sơkơ̆t hơdăh tơdrong pơtho pơhrăm ‘lơ̆ng păng tơƀôh trong năm ƀlep lơ̆m tơdrong jang chă ƀôh, rơih iŏk, pơhrăm ming hŏk tro hơgei đơ̆ng Anih tơm vei lăng găh pơtho pơhrăm. Hơdai hăm tơƀôh tơdrong hơdrin đơ̆ng hŏk tro, thây kô pơtho, hnam trưng păng đơ̆ng anih pơtho pơhrăm lơ̆m pơtho ‘lơ̆ng, hŏk ‘lơ̆ng.