Đơ̆ng rŏng hlŏh 10 khei jang, 3km trong ƀât kơ̆l krang Prenn đei man đang păng đei ăn gre kơdâu vih vât. ‘Nâu jĭ trong gre tơm gĭt kăl, tơƀưh Đà Lạt hăm dôm anih chă tơmang lăng tih nhen Chơkơi Datanla, Anih chă tơmang lăng Dơnâu đak Tuyền Lâm, Anih tơmang lăng Trúc Lâm păng 1,2 tơring kon pơlei oei găh Pơbăh plt.

Tơdrong tơmât yoa jăl trong âu ưh lăp pơm lăp ăn tơdrong ‘mĕh chă tơmang lăng, yak vih vât đơ̆ng tơmoi păng kon poơlei ƀât Têt Tây truh âu kơnh đĕch, mă oei tơjur ƀiơ̆ tơdrong hrăt hrot gre lơ̆m plt dơ̆ng. Dang ei hlŏh 4km trong oei đei dơ̆ng tơ̆ krang Prenn đơ̆ng Chơkơi Datanla jur tơ̆ jơ̆ng krang tŏk bŏk oei hăt jang pơkĕh. Vă pơm ‘lơ̆ng Trong krang Prenn gơ̆h jang đang păng ăn gre kơdâu tôch trong adrol kơ Tết nguyên đán truh âu kơnh, Grŭp jang Đèo Cả oei hơtŏk khul bơngai jang, kơmăy kơmŏk, pơgơ̆r bơ̆ jang tŏk ca ming man prăt năr prăt măng.