Thiếu tướng Nguyễn Đức Mạnh, Phŏ ƀok yŏng chĕp kơ̆l Ƀô đô̆i vei lăng tơring sơlam, Anih tơm vei lăng khul linh teh đak vang truh akŏm păng iung pơma tơ̆ âu. Pơma tơ̆ Hop akŏm, Thiếu tướng Nguyễn Đức Mạnh tơchĕng ‘lơ̆ng dôm tơdrong jơnei mă Ƀô đô̆i vei lăng tơring sơlam Gia Lai jang đei lơ̆m dôm sơnăm âu ki. Ƀô đô̆i vei lăng tơring sơlam dêh char Gia Lai hơnơ̆ng jang ‘lơ̆ng tơdrong vei lăng tơdrong pơm tơm teh đak, vei lăng sơđơ̆ng tơ̆ tơring sơlam, tơgop tih ăn tơdrong pơjing, hơmet kơjăp anih jang chinh trĭ păng atŏk tơiung mŭk drăm, tơpôl tơ̆ tơring sơlam.

Tơ̆ hơnăp kơnh, Ƀô đô̆i vei lăng tơring sơlam dêh char Gia Lai adrin hơmet pơ ‘lơ̆ng rim tơdrong pơmat tat, jang đang ‘lơ̆ng dôm tơdrong hơgăt, tơdrong pơjei băl đơ̆ng 2024-2029, pơjing Khul linh pran kơjăp, Đảng ƀô̆ rơgŏh ‘lơ̆ng, gơ̆h hơgei. Hơnơ̆ng tơblăh phă hŭt rim tơdrong hơlĕnh pơdăr, phă ngơ̆r đơ̆ng khul hơyăt; vei kơjăp tơdrong pơm tơm teh đak, vei lăng ‘lơ̆ng tơdrong sơđơ̆ng tơ̆ tơring sơlam lơ̆m chăl ‘nao.