Kiơ̆ hla ar chih tơroi, 9 khei sơnăm 2023 jang tŏk truh 6,87% lơ hlŏh tơ̆ tơring Tây Nguyên. Mă lei 1,2 tơdrong hơgăt gĭt kăl jang đei tŏ sĕt đĕch, mă hơdăh nhen: thu mong jên ăn tĕh đak dang 2.400 ti (hơtŏ hăm dang 54,27% kơsô̆ tơlĕch); tơlĕch jên jang đơ̆ng tĕh đak loi 1.300 ti, iŏk đei dang 35% nơ̆r hơgăt.

Hop akŏm chă pơma nuh, hơlen năng rim tơdrong jang đei; pơma tơƀôh dôm tơdrong tam mă pran ‘lơ̆ng, chih hơdăh hơnăp jang đơ̆ng rim Kơdră jang lơ̆m Anih chĕp kơ̆l đảng dêh char, bơngai chĕp kơ̆l păng khul grŭp tơpôl, dôm anih jang kơpal, tơring tơrang hăm dôm tơdrong tam mă pran ‘lơ̆ng.

Kiơ̆ ƀok Dương Văn Trang - Bí thư đảng dêh char Kon Tum: 3 khei oei đei dơ̆ng tơdrong tơlĕch jên jang kơ tĕh đak athei bơ̆ jang mă pran ‘lơ̆ng hlŏh dơ̆ng. Tơdăh ưh đei tơlĕch jên jang ‘lơ̆ng, blŭng a đe kơdră chĕp kơ̆l Đảng lơ̆m Anih vei lăng kon pơlei dêh char athei chĭu pŭ. Đang kơ ‘nŏh, Kơdră Anih tơlĕch nơ̆r sơkơ̆t tơmât jên jang jĭ anih jang tơgŭm, tơƀôh trong jang păng mă hơtuch ‘nŏh jĭ tơ ‘ngla tơmât jên jang athei pŭ găh tơdrong ‘nâu.