Tơ̆ jơ bơ̆jang, Bí thư Anih jang Đảng pơlei tơm Hải Phòng Lê Tiến Châu pơma hơdăh, kon pơlei Việt Nam ling lang chih răk păng băt bơnê kơ dôm tơdrong ‘mêm tơpă, tơdrong tơgŭm tih tên đơ̆ng kon pơlei Bulgaria lơ̆m tơdrong iung tơblăh iŏk rơngei hơdrĕch hơdrŭng, pơjing teh đak. Kơdră tơm teh đak Bulgaria Rumen Radev pơma hơdăh, Bulgaria ling lang sơng iŏk tơdrong pơvei tơbôl joăt joe ‘lơ̆ng hơiă đơ̆ng 2 teh đak.

Lơ̆m ‘măng năm ngôi tơ̆ pơlei tơm Hải Phòng ‘măng âu, Kơdră tơm Rumen Radev ‘meh vă Hải Phòng pơma dơnuh tơdrong hlôh vao hơtŏk tơiung tơ̆ pơđĭ tơdrong jang so păng ‘nao; hlôh vao đơ̆ng pơlei tơm lơ̆m sơng iŏk tơmơ̆t jên jang, hơmet pơ ‘lơ̆ng dôm tơdrong ƀơm truh ƀơ̆t hơtŏk tơiung tôch kơ hrĕnh mă lei oei pơvei păng hơtŏk tơiung kơjă kăp gĭt tơm đơ̆ng hơdrĕch hơdrŭng. Kơdră tơm Rumen Radev ‘meh vă 2 păh gô đei dôm tơdrong jang hơdai hơdăh tơ̆ dôm tơdrong jang vang bơngơ̆t truh, tơgop pơtrŭt pơvei tơbôl joăt joe păng jang hơdai đơ̆ng 2 teh đak Việt Nam - Bulgaria yak mơ̆t lơ̆m jrŭ să păng đei yua hloh dơ̆ng.