Tơ̆ hop akŏm, tang măt Khŭl pơgơ̆r jang kơ Anih jang Đảng dêh char Gia Lai roi tơbăt hơdăh dôm tơdrong Tơchơ̆t đơ̆ng Khŭl chĕp kơ̆l pơgơ̆r Anih jang Đảng dêh char Gia Lai, ‘noh: Ăn ƀok Nguyễn Trường Sơn- Phŏ Bí thư Anih jang Đảng dêh char, Kơdră Anih vei lăng kon pơlei Thị xăh Ayun Pa iŏk bơ̆jang tơ̆ Anih vei lăng trong nơnăm gre kơdâu. Ƀok Trần Anh Tuấn- Phŏ Kơdră Anih jang Khoa hŏk păng Kơmăy kơmŏk Gia Lai đei athei vang jang lơ̆m Khŭl chĕp kơ̆l pơgơ̆r Đảng bộ, Khŭl chĕp kơ̆l pơgơ̆r Anih jang Đảng Thị xăh Ayun Pa, pơm Phŏ Bí thư Anih jang Đảng Thị xăh jăl jang 2020-2025; Anih jang Đảng dêh char Gia Lai roi tơƀôh ƀok Anh Tuấn vă Jơnŭm pơgơ̆r kon pơlei thị xăh Ayun Pa pôk pơm Kơdră Anih vei lăng kon pơlei thị xăh jăl jang 2021-2026.

Ƀok Phan Hồ Giang, Phŏ Bí thư Anih jang Đoàn dêh char đei ăn iŏk bơ̆jang tơ̆ Anih jang Khoa hŏk păng Kơmăy kơmŏk. Pơma tơ̆ hop akŏm, ƀok Rah Lan Chung, Phŏ Bí thư Anih jang Đảng dêh char Gia Lai athei dôm kang ƀô̆ đei pôk hơtŏk, ăn năm bơ̆jang lơ̆m kơchư̆k jang ‘nao kăl kơ hơtŏk jơhngơ̆m đon jang tơnăp, kơchăng gơh băt hơnăp jang, hơtŏk tơdrong kĕ jang vă jang đang ‘lơ̆ng hơnăp jang.