02 grŭp tơdrong jang đei rơih iŏk apĭnh jet ‘noh tơdrong kăl păng lăp hăm ‘meh vă yan âu tơlĕch ăn, đei bơngai tăh hla păng Kon pơlei  tôch kơ bơngơ̆t truh, mă loi ‘noh jĭ grŭp tơdrong jang jên hu. Tơdrong apĭnh jet păng tơl nơ̆r apĭnh jet akŏm lơ̆m tơdrong jang vei lăng, dăr lăng tơdrong jang tĕch mơdro ƀao hiêm; asong phep bơ̆jang đơ̆ng dôm kŏng ti jang pơvih pơvăn ƀơm truh jên hu; tơdrong bơ̆jang kiơ̆ khôi luơ̆t hăm tơdrong jang tĕch mơdro xổ số, pơdơ̆ng tơmam, casino păng pơngôi điện tử đei hơpăh. Hăm grŭp tơdrong jang tơbôl, tơdrong apĭnh jet păng tơl nơ̆r apĭnh jet akŏm lơ̆m tơdrong jang vei lăng tơgŭm kon pơlei Việt Nam tơ̆ teh đak đe.

Tơdrong rơih iŏk tơdrong jang păng grŭp tơdrong jang apĭnh jet ăn ƀôh tơdrong jang kơjăp đơ̆ng Anih chĕp kơ̆l pơgơ̆r Kuôk hô̆i; tơklep tơdrong jang đơ̆ng anih jang kon pơlei rơih hăm yan âu tơdrong arih sa, pơm lăp păng tơtom hơmet pơ ‘lơ̆ng dôm athei, tơdrong đei ƀôh mă yan âu tơdrong arih sa tơlĕch ăn.