Tơroi tơbăt đơ̆ng Khŭl kơdră teh đak tơroi rơđăh: sơnăm 2023, tơlĕch jên jang teh đak jô̆ pơhlom iŏk đei 2 rơbâu 109 ti hlak jên. Tơdrong jang vei lăng tơlĕch jên jang teh đak đei bơ̆jang kiơ̆ kơchăng, kơjăp kiơ̆ jô̆ hơlen hơdrol, vei sơđơ̆ng ƀlep trong jang tơgŭm, jang kiơ̆ ‘mơ ‘met tơlĕch hơnơ̆ng, kăt tơjur dôm hơnăp jang tơlĕch ăn tam mă kăl, hiơ̆ tơlĕch jang. Akŏp kơsô̆ ‘mơ ‘met jên teh đak sơnăm 2023 ‘noh 83 ti hlak jên.

Kŭm lơ̆m năr ‘nâu, 15/5, Anih jang chĕp kơ̆l pơgơ̆r Kuôk hô̆i ăn tơgop nơ̆r găh tơdrong hơmet ăn ‘măng hop akŏm mă 7 păng pơtôch ‘măng hop akŏm ưh kơ ê ‘măng mă 7; Ăn tơgop nơ̆r găh tơroi tơbăt pơtôch dăr hơlen tơdrong hơmet pơ ‘lơ̆ng, tơl nơ̆r apĭnh đơ̆ng bơngai tăh hla gơih truh ‘Măng hop akŏm mă 6, Kuôk hô̆i jăl 15; set hơlen tơroi tơbăt tơdrong jang kon pơlei pĭnh, ‘meh vă đơ̆ng kuôk hô̆i khei 4 sơnăm ‘nâu.