Kơdră Kuôk hô̆i Vương Đình Huệ tơroi rơđăh, ‘măng hop akŏm mă 31, Anih chĕp kơ̆l pơgơ̆r Kuôk hô̆i ăn tơgop nơ̆r găh roi tơblang, chih iŏk hăm 7 Luơ̆t ‘noh; Luơ̆t Anih tơm (hơmet ming); Luơ̆t hơmet ming, tơmơ̆t dơ̆ng 1,2 hơpăng đơ̆ng Luơ̆t pơting chă bơngai răt tơmam; Luơ̆t pơgơ̆r Anih sek tơlang kon pơlei (hơmet ming); Luơ̆t trong nơnăm; Luơ̆t vei sơđơ̆ng trong nơnăm; Luơ̆t Kơmăy kơmŏk khŭl lĭnh, tơdrong sơđơ̆ng; Luơ̆t ƀao hiêm tơpôl (hơmet ming).

Kơdră Kuôk hô̆i tơbăt, tơdrong kăl kơ lăng truh tơ̆ ‘măng hop akŏm ‘noh jĭ Anih chĕp kơ̆l pơgơ̆r Kuôk hô̆i gô pơgơ̆r apĭnh jet păng tơl nơ̆r apĭnh jet. Kơdră Anih tơm vei lăng jên hu Hồ Đức Phớc păng Kơdră Anih tơm jang tơbôl Bùi Thanh Sơn gô tơl nơ̆r apĭnh jet 2 grŭp tơdrong găh tơdrong jang jên hu păng jang tơbôl.