Tơ̆ Hop akŏm, Kơdră Kuôk hô̆i Vương Đình Huệ pơma hơdăh tơdrong jang dăr hơlen đơ̆ng Kuôk hô̆i, Anih chĕp kơ̆l pơgơ̆r Kuôk hô̆i đei pơgơ̆r tơlĕch jang tôm tơdrong, hrơ̆ch 1 ‘măng, vei sơđơ̆ng hrĕnh păng jang đang pơ đĭ dôm tơdrong kiơ̆ trong tơlĕch jang; hơdai hăm ‘noh, roi ‘năr roi tơƀôh tơdrong hơbĕch hơbal tơ̆ hơnăp dôm tơdrong tih, đei ƀôh lơ̆m tơdrong arih sa mŭk drăm - tơpôl kơ teh đak đei bơngai tah hla, kon pơlei, dôm bơngai tang măt Kuôk hô̆i bơngơ̆t truh.

Hơlen lăng, tơdrong jang apĭnh jet păng tơl nơ̆r apĭnh jet tơ̆ dôm ‘măng hop akŏm Kuôk hô̆i hlôi vei sơđơ̆ng ƀlep tơdrong hơgăt, hơdai hăm yan âu hăm lơ tơplih ‘nao, tơtom hơmet pơ ‘lơ̆ng dôm tơdrong bơngai tăh hla păng kon pơlei bơngơ̆t truh. Kiơ̆ đơ̆ng tơdrong jang apĭnh jet ăn ƀôh, tơdrong rơih iŏk, tơchơ̆t tơdrong apĭnh jet hlôi lăng kiơ̆ yan âu, “ƀlep”, “ƀơm” dôm tơdrong “tơtŏ”, ƀlĕk kơ đon đei ƀôh lơ̆m tơdrong arih sa mŭk drăm - tơpôl, adoi jing dôm tơdrong dei dei hai, đei tơdrong gĭt kăl, đunh đai hai, pơm lăp ‘meh vă đơ̆ng bơngai tăh hla păng kon pơlei lơ̆m teh đak.