Đei dang 500 ‘nu bơngai truh đơ̆ng 5 xăh đei: Đăk Nên, Đăk Ring, Măng Bút, Đăk Tăng, Măng Cành kơ apŭng Kon Plông vang truh hăm dôm lăm pơtâp pơhrăm. Kiơ̆ đơ̆ng lăm pơtâp pơhrăm âu, kon pơlei, mă lơ ‘nŏh jĭ kon pơlei bơngai Xơ Đăng đei ƀơk ăn hla ar chih tơroi, hla ar pơtho tơƀôh veh ver, tang gar teh dơdrŏ.

Ưh lăp vang hŏk tôm păng mơ̆ng tôch hơlen đĕch, kon pơlei tơ̆ dôm xăh lơ̆m tơring đei teh dơdrŏ tơ̆ apŭng Kon Plông, dêh char Kon Tum oei kơchăng tơlĕch lơ nơ̆r apinh, pơma tơlĕch dôm tơdrong oei tơtăm vă kăn ƀô̆ tơl tơblang. Tiến sĩ Bùi Thị Nhung, 1 lơ̆m 5 ‘nu bơngai juăt jang truh đơ̆ng Anih jang Vật lý plei teh ăn tơbăt, kŭm đơ̆ng tơdrong tơƀâp, pơma nuh tơpăt hăm kon pơlei 5 xăh lơ̆m tơring đei teh dơdrŏ, Anih jang Vật lý plei teh vă hơnơ̆ng tơchĕng hơlen tơlĕch dôm trong jang lăp hăm yăn âu tơ̆ tơring, vă kon pơlei hơđơ̆ng jơhngâm arih xa kiơ̆ teh dơdrŏ.