Kơdră Kuôk hô̆i Vương Đình Huệ  pơma ăh pơtơm păng pơtôch kơ 'măng apinh tơl nơ̆r âu. Ƀô̆ trương Anih tơm Tư Phap Lê Thành Long akŏm tơl nơ̆r bơngai tang măt Kuôk hô̆i gah tơdrong chih akŏm luơ̆t, tơchơ̆t kơ teh đak; dôm trong jang vei sơđơ̆ng 'lơ̆ng păng hla bar dôm tơdrong tơlĕch jang, hơmŏ pơtruh ăn Kuôk hô̆i hơlen lăng; trong jang hơtŏk pơ-'lơ̆ng luơ̆t tơchơ̆t, tơdrong hơlen lăng đơ̆ng jơnŭm jang kơpal, tang găn păng tơjră xa pơjĭp, kơnê̆ lơ̆m tơdrong chih akŏm luơ̆t mă Jơnŭm pơgơ̆r teh đak vei lăng.

Gah tơdrong jang kơ Anih tơm Choh jang xa păng Hơtŏk tơring tơrang, Ƀô̆ trương Lê Minh Hoan tơl nơ̆r gah trong jang pơklaih tơnap tap lơ̆m tĕch tơlĕch tơmam choh pơtăm đei ăn teh đak đe, atŭm hăm noh tơdrong jang rôp ka hơdang; tơdrong hŭt lê̆ “theh dreng” đơ̆ng Anih jang châu Âu (EC) hăm ka hơdang; Tơdrong tơplih iŏk yua, thu iŏk teh pơtăm ƀa, vei sơđơ̆ng tơmam drăm xa păng tĕch phe ăn teh đak đe.